Migne Patrologia Latina Tomus 53
AucVar.VetTes 11 Auctores varii Parisiis J. P. Migne 1845 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
D. Hieronymus, in libro de Viris illustribus, cap. 121. Optatus Afer episcopus Milevitanus ex parte catholica scripsit sub Valentiniano et Valente principibus adversum Donatianae partis calumniam libros sex, in quibus asserit crimen Donatianorum in nos falso retorqueri.
S. Augustinus, lib. II de Doctrina Christiana, cap. 40, num. 61.
Nonne aspicimus quanto auro et argento et veste suffarcinatus exierit de Aegypto Cyprianus doctor suavissimus et martyr beatissimus; quanto Lactantius, quanto Victorinus, Optatus, Hilarius, ut de vivis taceam.
Idem, lib. I contra epistolam Parmeniani, cap. 13, num. 5.
Legant qui volunt quae narrat et quibus documentis quam multa persuadeat venerabilis memoriae Milevitanus episcopus Catholicae communionis Optatus, sive de Lucilla pecuniosissima tunc et factiosissima foemina; quam pro Ecclesiae disciplina sanctus Caecilianus adhuc diaconus laeserat, vel de caeteris factionis ejus consortibus, sive furibus Ecclesiastici argenti, sive ad episcopatum se non pervenisse dolentibus et sibi praelatum Caecilianum insidiis quibus poterant insectantibus, sive de Numidis episcopis quos ista factio convocaverat ad perniciem Caeciliani, ut illo deposito alter eis ordinaretur. Haec habentur libro primo Optati.
Idem, in libro de unitate Ecclesiae, cap. 19, num. 50.
Nec nos propterea dicimus nobis credi oportere, quia ipsam quam tenemus commendavit Milevitanus Optatus vel Mediolanensis Ambrosius.
Idem, in Breviculo Collationis, cap. 20, num. 38.
Sed hinc repulsi (episcopi Donatistae) velut aliquid validissimum prolaturi petierunt Optatum legi, quod et ante petiverant, unde se probaturos dicebant Caecilianum ab imperatore damnatum . . . Optatum vero legi multo instantius flagitabant . . . Recitatus est Optatus recitantibus Donatistis ubi ait: Eodem tempore Donatus petiit ut ei reverti licuisset et ad Carthaginem accederet; tunc a Philumeno suggestore ejus imperatori suggestum est, ut bono pacis Caecilianus Brixiae teneretur et factum est . . . In quibus verbis Optati cum omnino nulla Caeciliani damnatio sicut illi demonstraturos se esse promiserant reperiri potuisset, jussit cognitor totam paginam recitari, ut de superioribus, et inferioribus verbis voluntas ejus qui scripserat, nosceretur; et ex officio recitatum est: Caecilianus omnium supramemoratorum sententiis innocens pronuntiatus; quod cum recitaretur Donatistae dixerunt hoc se non petiisse recitari stomachantes adversus eos qui risum tenere non potuerunt, cum audissent quam apertam contra semetipsos paginam protulissent. Vide de eadem re capitula collationis Carthaginensis diei tertiae 375, 477 et sequentia usque ad 484 et postea capitulum 532, et sequentia usque ad 539, et epistolam concilii Zertensis apud S. Augustinum 141, num. 9.
8 S. Fulgentius, lib. II ad Monimum, cap. 13.
Sanctus autem Milevitanus episcopus in sexto adversus Parmenianum libro consilium de virginibus Paulum supererogasse testatur his verbis: Virginitas enim voluntatis res est, non necessitatis, et caetera quae habentur infra, lib. VI, § 4, pag. 94, et cap. 15. Neque enim a veritate receditur in hac supererogatione Apostoli, sive quod sanctus Ambrosius, sive quod sanctus Augustinus, sive quod sanctus Optatus senserunt a nobis quoque salva veritate fidei sentiatur.
Honorius Augustodunensis, in libro de Scriptoribus Ecclesiasticis, cap. III.
Optatus Afer Milevitanus episcopus sub Valente scripsit adversum Donatianae partis calumniam.
Martyrologium Romanum, ad diem IV Junii.
Milevi in Numidia sancti Optati episcopi doctrina et sanctitate conspicui.