 Oratio Manasse |
Liber Quartus Esdræ  |
Caput 1[recensere]
1 Et fecit Josias Pascha in Jerosolymis Domino, et immolavit Phase quarta decima luna primi mensis, 2 statuens sacerdotes per vices dierum stolis amictos in templo Domini. 3 Et dixit Levitis sacris servis Israël, ut sanctificarent se Domino in positione sanctæ arcæ Domini, in domo, quam ædificavit Salomon filius David rex. 4 Non erit vobis tollere super humeros eam. Et nunc deservite Domino vestro, et curam agite gentis illius Israël ex parte secundum pagos et tribus vestras, 5 secundum scripturam David regis Israël, et secundum magnificentiam Salomonis filii ejus, omnes in templo, et secundum particulam principatus paternam vestram eorum, qui stant in conspectu fratrum filiorum Israël. 6 Immolate Pascha, et sacrificia parate fratribus vestris, et facite secundum præceptum Domini quod datum est Moysi. 7 Et donavit Josias in plebem, quæ inventa est, ovium, agnorum, et hœdorum, et caprarum triginta millia, vitulos tria millia. 8 Hæc de regalibus data sunt secundum promissionem populo : et sacerdotibus in Pascha, oves numero duo millia, ac vituli centum. 9 Et Jechonias, et Semejas, et Nathanaël fratres, et Hasabias, et Oziel, et Coraba in Phase, oves quinque millia, vitulos quingentos. 10 Et hæc cum fierent eleganter, steterunt sacerdotes et Levitæ habentes azyma per tribus. 11 Et secundum partes principatus patrum in conspectu populi offerebant Domino, secundum ea quæ in libro Moysi scripta sunt : 12 et assaverunt Phase igni prout oportebat : et hostias coxerunt in emolis, et in ollis cum benevolentia : 13 et attulerunt omnibus qui erant ex plebe : et post hæc paraverunt sibi et sacerdotibus. 14 Sacerdotes enim offerebant adipes, usque dum finita esset hora : et Levitæ paraverunt sibi et fratribus suis, filiis Aaron. 15 Et sacri cantores filii Asaph erant per ordinem secundum præceptum David, et Asaph, et Zacharias, et Jeddimus, qui erat a rege. 16 Et ostiarii per singulas januas, ita ut non prævaricaretur unusquisque suam : fratres enim illorum paraverunt illis. 17 Et consummata sunt quæ pertinebant ad sacrificium Domini. 18 In illa die egerunt Phase, et offerebant hostias super Domini sacrificium, secundum præceptum regis Josiæ. 19 Et egerunt filii Israël, qui inventi sunt in tempore illo, Phase : et diem festum azymorum per dies septem : 20 et non est celebratum Phase tale in Israël, a temporibus Samuelis prophetæ : 21 et omnes reges Israël non celebraverunt tale Pascha, quale egit Josias, et Sacerdotes et Levitæ, et Judæi, et omnis Israël, qui inventi sunt in commoratione Jerosolymis. 22 Octavo decimo anno, regnante Josia, celebratum est Phase. 23 Et directa sunt opera Josiæ in conspectu Domini sui in corde pleno metuentis : 24 et quæ circa illum quidem conscripta sunt, in pristinis temporibus de eis, qui peccaverunt, quique irreligiosi fuerunt in Dominum præ omni gente, et qui non quæsierunt verba Domini super Israël. 25 Et post omnem actum hunc Josiæ, ascendit Pharao rex Ægypti, veniens in Charcamis ab itinere super Euphratem, et exiit obviam illi Josias. 26 Et misit rex Ægypti ad Josiam, dicens : Quid mihi et tibi est rex Judæ ? 27 Non sum missus a Domino ut pugnem contra te: super Euphratem enim bellum meum est, festinans descende. 28 Et non est reversus Josias super currum : sed expugnare eum conabatur, non attendens verbum prophetæ ex ore Domini : 29 sed constituit ad eum bellum in campo Mageddo. Et descenderunt principes ad regem Josiam. 30 Et dixit rex pueris suis, Amovete me a prælio, infirmatus sum enim valde. Et statim amoverunt eum pueri ipsius de acie. 31 Et ascendit super currum secundarium suum : et perveniens Jerosolymam, vita functus est, et sepultus est in paterno sepulchro. 32 Et in tota Judæa lugebant Josiam : et qui præsidebant cum uxoribus lamentabant eum usque in hunc diem. Et datum est hoc fieri semper in omne genus Israël. 33 Hæc autem præscripta sunt in libro historiarum regum Judæ : et singula gesta actus Josiæ, et ejus gloria et intellectus ejus in lege Domini : quæque gesta sunt ab eo, et quæ non scripta sunt in libro regum Israël et Judæ. 34 Et assumentes qui erant ex gente Jechoniam filium Josiæ, constituerunt regem pro Josia patre suo, cum esset annorum trigintatrium. 35 Et regnavit super Israël mensibus tribus. Et amovit eum rex Ægypti, ne regnaret in Jerosolymis : 36 et mulctavit gentem argenti talenta centum, et auri talentum unum. 37 Et constituit rex Ægypti Joacim fratrem ipsius, regem Judæ et Jerusalem : 38 et alligavit magistratus Joacim, et Zaracelem fratrem suum, et apprehendens reduxit in Ægyptum. 39 Annorum erat Joacim vigintiquinque, cum regnare cœpisset in terra Juda et Jerusalem : et fecit malum in conspectu Domini. 40 Post hunc autem ascendit Nabuchodonosor rex Babylonis, et alligans eum in æreo vinculo, perduxit in Babyloniam : 41 et sacra vasa Domini accepit Nabuchodonosor, et tulit et consecravit in templo suo in Babylonia. 42 Nam de immunditia illius, et irreligiositate scriptum est in libro temporum regum. 43 Et regnavit Joachin filius ejus pro eo. Cum autem constitutus esset rex, erat annorum decem et octo. 44 Regnavit autem menses tres, et dies decem in Jerusalem, et fecit malum in conspectu Domini : 45 et post annum mittens Nabuchodonosor, transmigravit eum in Babyloniam simul cum sacris vasis Domini. 46 Et constituit Sedeciam regem Juda, et Jerusalem, cum esset annorum viginti unius : regnavit autem annis undecim. 47 Et fecit malum in conspectu Domini, et non est veritus a verbis, quæ dicta sunt ab Jeremia propheta ex ore Domini : 48 et adjuratus a rege Nabuchodonosor, perjurans discessit : et indurata cervice sua, et corde suo, transgressus est legitima Domini Dei Israël. 49 Et duces populi Domini multa inique gesserunt, et impie egerunt super omnes immunditias gentium : et polluerunt templum Domini quod sanctum erat in Jerosolymis. 50 Et misit Deus patrum ipsorum per angelum suum revocare eos, propter quod parceret illis, et tabernaculo suo. 51 Ipsi vero subsannabant in angelis suis : et qua die locutus est Dominus, erant illudentes prophetis ejus. 52 Qui usque ad iracundiam concitatus est super gentem suam propter irreligiositatem suam, et præcepit ascendere reges Chaldæorum. 53 Hi occiderunt juvenes eorum in gladio, in circuitu sancti templi eorum, et non pepercerunt juveni, et seni, et virgini, et adolescenti : 54 sed omnes traditi sunt in manus ipsorum : et omnia sacra vasa Domini, et regales apothecas resumentes, tulerunt in Babyloniam, 55 et incenderunt domum Domini, et demolierunt muros Jerusalem : et turres ejus incenderunt igne, 56 et consummaverunt omnia honorifica ejus, et ad nihilum redegerunt, et reliquos a gladio duxerunt in Babylonem. 57 Et erant servi illius usque dum regnarent Persæ in repletione verbi Domini in ore Jeremiæ : 58 quousque benigne ageret terra sabbata sua, omni tempore desertionis suæ sabbatizavit in applicatione annorum septuaginta septem.
Caput 2[recensere]
1 Regnante Cyro rege Persarum in consummatione verbi Domini in ore Jeremiæ, 2 suscitavit Dominus spiritum Cyri regis Persarum, et prædicavit in toto regno suo simul per scripturam, 3 dicens : Hæc dicit Cyrus rex Persarum : Me constituit regem orbi terrarum Dominus Israël, Dominus excelsus, 4 et significavit mihi ædificare domum sibi in Jerusalem quæ est in Judæa. 5 Si quis est ex genere vestro, Dominus ipsius ascendat cum eo in Jerusalem. 6 Quotquot ergo circa loca habitant, adiuvent eos qui sunt in loco ipso, in auro, et argento, 7 in dationibus cum equis et jumentis, cumque aliis quæ secundum vota apponuntur in ædem Domini, quæ est in Jerusalem. 8 Et stantes principes tribuum pagorum, et Judææ ex tribu Benjamin, et Sacerdotes et Levitæ, quos excitavit Dominus ascendere et ædificare domum Domini quæ est in Jerusalem, et qui erant in circuitu eorum, 9 adiuverunt in omni auro et argento ejus, et jumentis, et votis compluribus multi quorum sensus excitatus est. 10 Et Cyrus rex protulit vasa sacra Domini, quæ transtulit Nabuchodonosor rex Babylonis ex Jerusalem, et consecravit ea idolo suo, 11 et proferens ea Cyrus rex Persarum, tradidit Mithridato, qui erat super thesauros ipsius. 12 Per hunc autem tradita sunt Salmanasaro præsidi Judææ. 13 Horum autem hic numerus. Libatoria argentea duo millia quadringenta, athiscæ argenteæ triginta : phialæ aureæ triginta, item argenteæ duo millia quadringentæ, et alia vasa mille ; 14 omnia autem vasa aurea et argentea, quinque millia octingenta sexaginta. 15 Et enumerata sunt Salmanasaro simul cum his qui ex captivitate Babyloniæ venerant in Jerosolymam. 16 In Artaxerxis autem regis Persarum temporibus scripserunt ei de his qui habitabant in Judæa et Jerusalem, Balsamus, et Mithridatus, et Sabellius, et Rathimus, et Balthemus, Samelius scriba, et reliqui habitantes in Samaria, et ceteris locis subjectam epistolam regi Artaxerxi. 17 Domine, pueri tui Rathimus ab accidentibus, et Sabellius scriba, et reliqui curiæ tuæ judices in Cœlesyria et Phœnice. 18 Et nunc notum sit domino regi, quoniam Judæi qui ascenderunt a vobis ad nos, venientes in Jerusalem civitatem refugam et pessimam, ædificant furnos ejus, et statuunt muros, et templum suscitant. 19 Quod si civitas ista, et muri consummati fuerint, non tantum tributa non sustinebunt pendere, sed etiam regibus resistent. 20 Et quia id agitur circa templum, recte haberi arbitrati sumus non despicere hoc ipsum : 21 sed notum facere domino regi, ut si videbitur, rex, quæratur in libris patrum tuorum, 22 et invenies in admonitionibus scripta de his, et scies quoniam civitas ista fuit refuga, et reges, et civitates concutiens, 23 et Judæi refugæ, et prælia committentes in ea ab æterno, ob quam causam civitas ista deserta est. 24 Nunc ergo notum facimus, domine rex, quoniam si civitas hæc ædificata fuerit, et hujus muri erecti fuerint, descensus tibi non erit in Cœlesyriam, et Phœnicen. 25 Tunc scripsit rex Rathimo, qui scribebat accidentia, et Balthemo, et Sabellio scribæ, et ceteris constitutis, et habitantibus in Syria et Phœnice, ea quæ subjecta sunt. 26 Legi epistolam quam misistis mihi. Præcepi ergo inquiri, et inventum est, quoniam civitas illa est ab ævo regibus resistens, 27 et homines refugæ et prælia in ea efficientes, et reges fortissimi erant in Jerusalem dominantes, et tributa exigentes a Cœlesyria, et Phœnice. 28 Nunc ergo præcepi prohibere homines illos ædificare civitatem, et prohibere ne quid ultra hæc fiant : 29 sed nec procedant in plurimum, ex quo sunt malitiæ, ita ut regibus molestia importetur. 30 Tunc recitatis his quæ a rege Artaxerxe scripta fuerant, Rathimus, et Sabellius scriba, et qui cum his constituti erant jungentes festinanter venerunt in Jerusalem cum equitatu, et turba, et agmine : 31 cœperuntque ædificantes prohibere, et vacabant ab ædificatione templi in Jerusalem, usque secundo anno regni Darii regis Persarum.
Caput 3[recensere]
1 Rex Darius fecit cœnam magnam omnibus vernaculis suis, et omnibus magistratibus Mediæ et Persidis, 2 et omnibus purpuratis, et prætoribus, et consulibus, et præfectis sub illo ab India usque Æthiopiam, centum viginti septem provinciis. 3 Et cum manducassent, et bibissent, et satiati reverterentur. Tunc Darius rex ascendit in cubiculum suum, et dormivit, et expergefactus est. 4 Tunc illi tres juvenes corporis custodes, qui custodiebant corpus regis, dixerunt alter alteri : 5 Dicamus unusquisque nostrum sermonem qui præcellat : et cujuscumque apparuerit sermo sapientior alterius, dabit illi rex Darius dona magna, 6 purpura cooperiri, et in auro bibere, et super aurum dormire, et currum aureo fræno, et cydarim byssinam, et torquem circa collum : 7 et secundo loco sedebit a Dario propter sapientiam suam, et cognatus Darii vocabitur. 8 Tunc scribentes singuli suum verbum signaverunt, et posuerunt subtus cervical Darii regis, 9 et dixerunt, Cum surrexerit rex, dabimus illi scripta nostra, et quodcumque judicaverit rex e tribus, et magistratus Persidis, quoniam verbum ejus sapientius est, ipsi dabitur victoria sicut scriptum est. 10 Unus scripsit, Forte est vinum. 11 Alius scripsit, Fortior est rex. 12 Tertius scripsit, Fortiores sunt mulieres : super omnia autem vincit veritas. 13 Et cum surrexisset rex, acceperunt scripta sua, et dederunt illi, et legit. 14 Et mittens vocavit omnes magistratus Persarum, et Medos, et purpuratos, et prætores, et præfectos : 15 et sederunt in concilio : et lecta sunt scripta coram ipsis. 16 Et dixit, Vocate adolescentes, et ipsi indicabunt verba sua. Et vocati sunt, et introierunt. 17 Et dixit illis, indicate nobis de his quæ scripta sunt. Et cœpit prior, qui dixerat de fortitudine vini, 18 et dixit, Viri, quàm prævalet vinum omnibus hominibus qui bibunt illud ! seducit mentem. 19 Itemque regis et orphani facit mentem vanam. Item servi ac liberi, pauperis ac divitis, 20 et omnem mentem convertit in securitatem et jucunditatem, et non meminit omnem tristitiam et debitum, 21 et omnia præcordia facit honesta, et non meminit regem nec magistratum, et omnia per talenta loqui facit. 22 Et non meminerunt, cum biberunt, amicitiam nec fraternitatem : sed non multum sumunt gladios. 23 Et cum a vino merserint, et surrexerint, non meminerunt quæ gesserunt. 24 O viri, num præcellit vinum ? quis sic cogit facere ? Et tacuit hoc dicto.
Caput 4[recensere]
1 Et inchoavit sequens dicere, qui dixit de fortitudine regis. 2 O viri, num præcellunt homines, qui terram et mare obtinent, et omnia quæ in eis sunt ? 3 Rex autem super omnia præcellit, et dominatur eorum : et omne quodcumque dixerit illis, faciunt. 4 Et si miserit illos ad bellatores, vadunt, et demoliuntur montes, et muros, et turres. 5 Jugulantur, et jugulant, et regis verbum non prætereunt. Nam si vicerint, afferunt regi omnia quæcumque prædati fuerint. 6 Similiter et alii omnes, et quotquot non militant, nec pugnant, sed colunt terram : rursum cum fuerint metentes, afferunt tributa regi : 7 et ipse unus solus si dixerit occidite, occidunt : dixerit remittite, remittunt : 8 dixerit percutite, percutiunt : dixerit exterminate, exterminant : dixerit ædificate, ædificant : 9 dixerit excidite, excidunt : dixerit plantate, plantant : 10 et omnis plebs, et virtutes eum obaudiunt, et super hoc ipse recumbit, et bibit et dormit. 11 Hi autem custodiunt in circuitu eum, et non possunt ire singuli, et facere opera sua, sed in dicto obaudientes sunt ei. 12 Viri, quomodo non præcellit rex, qui sic diffamatur ? Et tacuit. 13 Tertius qui dixerat de mulieribus et veritate, hic est Zorobabel, cœpit loqui. 14 Viri, non magnus rex, et multi homines, nec vinum præcellit. Quis est ergo qui dominatur eorum ? 15 Nonne mulieres genuerunt regem, et omnem populum, qui dominatur mari et terræ : 16 et ex illis nati sunt, et ipsæ educaverunt eos, qui plantaverunt vineas ex quibus vinum fit ? 17 Et ipsæ faciunt stolas omnium hominum, et ipsæ faciunt gloriam hominibus, et non possunt homines separari a mulieribus. 18 Si congregaverint aurum et argentum, et omnem rem speciosam, et viderint mulierem unam bono habitu et bona specie, 19 omnia hæc relinquentes in eam intendunt, et aperto ore conspiciunt, et eam alliciunt magis quàm aurum et argentum, et omnem rem pretiosam. 20 Homo patrem suum relinquit qui enutriit illum, et suam regionem, et ad mulierem se conjungit. 21 Et cum muliere remittit animam : et neque patrem meminit, neque matrem, neque regionem. 22 Et hinc oportet vos scire : quoniam mulieres dominantur vestri. Nonne doletis ? 23 Et accipit homo gladium suum, et vadit in via facere furta, et homicidia, et mare navigare et flumina, 24 et leonem videt, et in tenebris ingreditur : et cum furtum fecerit, et fraudes et rapinas amabili suæ affert. 25 Et iterum diligit, homo uxorem suam, magis quàm patrem, aut matrem. 26 Et multi dementes facti sunt propter uxores suas : et servi facti sunt propter illas : 27 et multi perierunt et jugulati sunt, et peccaverunt propter mulieres. 28 Et nunc credite mihi, quia magnus est rex in potestate sua: quoniam omnes regiones verentur tangere eum. 29 Videbam tamen Apemen filiam Bezacis, mirifici concubinam regis, sedentem juxta regem ad dexteram, 30 et auferentem diadema de capite ejus, et imponentem sibi; et palmis cædebat regem de sinistra manu. 31 Et super hæc aperto ore intuebatur eam : et si arriserit ei, ridet. Nam si indignata ei fuerit, blanditur, donec reconcilietur in gratiam. 32 O viri, cur non sunt fortiores mulieres ? Magna est terra, et excelsum est cælum : quis ista agit ? 33 Et tunc rex, et purpurati intuebantur in alterutrum. Et inchoavit loqui de veritate. 34 O viri, nonne fortes sunt mulieres ? Magna est terra, et excelsum est cælum : et velox cursus solis convertit in gyro cælum in locum suum in una die. 35 Nonne magnificus est qui hæc facit, et veritas magna, et fortior præ omnibus ? 36 Omnis terra veritatem invocat, cælum etiam ipsam benedicit, et omnia opera moventur, et tremunt eam, et non est cum ea quicquam iniquum. 37 Vinum iniquum, iniquus rex, iniquæ mulieres, iniqui omnes filii hominum, et iniqua illorum omnia opera, et non est in ipsis veritas, et in sua iniquitate peribunt : 38 et veritas manet, et invalescit in æternum, et vivit, et obtinet in sæcula sæculorum. 39 Nec est apud eam accipere personas, neque differentias : sed quæ justa sunt facit omnibus, injustis ac malignis, et omnes benignantur in operibus ejus. 40 Et non est in judicio ejus iniquum, sed fortitudo, et regnum, et potestas, et majestas omnium ævorum. Benedictus Deus veritatis. 41 Et desiit loquendo. Et omnes populi clamaverunt, et dixerunt, Magna est veritas, et prævalet. 42 Tunc rex ait illi, Pete, si quid vis amplius, quàm quæ scripta sunt, et dabo tibi, secundum quod inventus es sapientior proximis, et proximus mihi sedebis, et cognatus meus vocaberis. 43 Tunc ait regi, Memor esto voti tui, quod vovisti, ædificare Jerusalem, in die qua regnum accepisti : 44 et omnia vasa quæ accepta sunt ex Jerusalem, remittere, quæ separavit Cyrus, quando mactavit Babyloniam, et voluit remittere ea ibi. 45 Et tu vovisti ædificare templum, quod incenderunt Idumæi, quando exterminata est Judæa a Chaldæis. 46 Et nunc hoc est quod postulo domine, et quod peto, hoc est majestas quod a te postulo, ut facias votum quod vovisti regi cæli ex ore tuo. 47 Tunc surgens Darius rex, osculatus est illum : et scripsit epistolas ad omnes dispensatores, et præfectos, et purpuratos, ut deducerent eum, et eos qui cum illo erant, omnes ascendentes ædificare Jerusalem. 48 Et omnibus præfectis, qui erant in Syria, et Phœnice, et Libano scripsit epistolas, ut traherent ligna cedrina a Libano in Jerusalem, ut ædificarent cum eis civitatem. 49 Et scripsit omnibus Judæis qui ascendebant a regno in Judæam pro libertate, omnem potentem, et magistratum, et præfectum non supervenire ad januas ipsorum, 50 et omnem regionem quam obtinuerant immunem esse eis, et Idumæi relinquant castella quæ obtinent Judæorum : 51 et in structuram templi dare per singulos annos talenta viginti, usque dum perædificaretur : 52 et super sacrarium holocautomata ustulare quotidie, sicut habent præceptum : alia talenta decem offerre per singulos annos, 53 et omnibus qui procedunt a Babylonia condere civitatem : ut esset libertas tam ipsis, quàm filiis eorum, et omnibus sacerdotibus qui præcedunt : 54 Scripsit autem et quantitatem, et sacram stolam jussit dari, in qua deservirent ; 55 et Levitis scripsit dare præcepta, usque in diem, qua consummabitur domus, et Jerusalem extruetur : 56 et omnibus custodientibus civitatem scripsit dari eis sortes et stipendia. 57 Et dimisit omnia vasa quæcumque separaverat Cyrus a Babylonia, et omnia quæcumque dixit Cyrus, et ipse præcepit fieri, et mitti Jerusalem. 58 Et cum processisset ille adolescens, elevans faciem in Jerusalem, benedixit regem cæli, 59 et dixit, Abs te est victoria, et abs te est sapientia et claritas. Et ego servus tuus sum. 60 Benedictus es, qui dedisti mihi sapientiam, et tibi confitebor Domine Deus patrum nostrorum. 61 Et accepit epistolas, et profectus est in Babyloniam. Et venit, et nunciavit fratribus suis omnibus qui fuerunt in Babylonia : 62 et benedixerunt Deum patrum suorum, quoniam dedit illis remissionem et refrigerium, 63 ut ascenderent et ædificarent Jerusalem, et templum ubi nominatum est nomen ejus in ipso, et exultaverunt cum musicis et lætitia diebus septem.
Caput 5[recensere]
1 Post hæc autem electi sunt, ut ascenderent principes pagorum per domos, et tribus suas, et uxores illorum, et filii et filiæ eorum, et servi et ancillæ ipsorum ,et pecora eorum. 2 Et Darius rex misit una cum eis equites mille, donec deducerent eos in Jerusalem cum pace, et cum musicis, et cum tympanis et tibiis. 3 Et omnes fratres erant ludentes, et fecit eos ascendere simul cum eis. 4 Et hæc sunt nomina virorum, qui ascenderunt per pagos suos in tribus, et in partem principatus ipsorum. 5 Sacerdotes : Filii Phinees, filii Aaron, Jesus filius Josedec, Joacim filius Zorobabel filii Salathiel de domo David, ex progenie Phares, de tribu Juda, 6 qui locutus est sub Dario rege Persarum sermones mirificos in secundo anno regni ipsius mense Nisan primo. 7 Sunt autem hi, qui ascenderunt ex Judæa de captivitate transmigrationis, quos transmigravit Nabuchodonosor rex Babyloniæ in Babylonem. Et reversus est in Jerusalem. 8 Et requisivit partem Judææ unusquisque in civitatem suam, qui venerunt cum Zorobabel, et Jesu, Nehemias, Areores, Elimeo, Emmanio, Mardocheo, Beelsuro, Mechpsatochor, Olioro, Emonia unus de principibus eorum. 9 Et numerus a Gentilibus eorum, ex præpositis eorum filii Phares, duo millia centum septuaginta duo. 10 Filii Ares, tria millia quinquaginta septem : 11 filii Phœmo, centum quadraginta duo : in filiis Jesu et Joabes, mille trecenti duo : 12 filii Demu, duo millia quadringenti septuaginta : filii Choraba ducenti quinque : filii Banica, centum sexaginta octo : 13 filii Bebech, quadringenti tres : filii Archad, quadringenti viginti septem. 14 Filii Cham triginta septem : filii Zoroar, duo millia sexaginta septem : filii Adin, quadringenti sexaginta unus. 15 Filii Aderectis, centum octo : filii Ciaso et Zelas, centum septem : filii Azoroc, quadringenti triginta novem : 16 filii Jedarbone, centum triginta duo filii Ananiæ, centum triginta : filii Asoni, nonaginta : 17 filii Marsar, quadringenti viginti duo, filii Zabarus, nonaginta quinque : filii Sepolemon, centum viginti tres : 18 filii Nepopas, quinquaginta quinque : filii Nechanatus, centum quinquaginta octo : filii Cebethamus, centum triginta duo : 19 filii Crearpatros qui Enocadies, et Modiæ, quadringenti viginti tres : qui ex Gramas et Gabea, centum viginti unus : 20 qui ex Besselon, et Ceagge, sexaginta quinque : qui ex Bastaro, centum viginti duo. 21 Qui ex Bechenobes, quinquaginta quinque : filii Liptis, centum quinquaginta quinque : filii Labonni, trecenti quinquaginta septem : 22 filii Sichem, trecenti septuaginta : filii Suadon, et Cliomus, trecenti septuaginta octo : 23 filii Ericus, duo millia centum quadraginta quinque : filii Anaas, trecenti septuaginta. Sacerdotes. 24 Filii Jeddus, filii Euther, filii Eliasib, trecenti septuaginta duo : filii Emerus, ducenti quinquaginta duo : 25 filii Phasurii, trecenti quinquaginta septem : filii Caree, ducenti vigintis eptem. 26 Levitæ : Filii Jesu in Caduhel, et Bamis, et Serebias, et Edias, septuaginta quattuor. Omnis numerus a duodecimo anno, triginta millia quadringenti sexaginta duo, 27 filii, et filiæ, et uxores, omnis computatio, quadraginta millia ducenti quadraginta duo. 28 Filii sacerdotum, qui psallebant in templo : filii Asaph, centum viginti octo. 29 Ostiarii vero : filii Esmenni, filii Azer, filii Amon, filii Accuba, Topa filii Tobi, omnes centum triginta novem. 30 Sacerdotes servientes in templo , filii Sel, filii Gaspha, filii Tobloch, filii Cariæ, filii Su, filii Hellu, filii Labana, filii Armacha, filii Accub, filii Utha, filii Cetha, filii Aggab, filii Obai, filii Anani, filii Canna, filii Geddu, 31 filii An, filii Radin, filii Desanon, filii Nachoba, filii Caseba, filii Gaze, filii Ozui, filii Sinone, filii Attre, filii Hasten, filii Asiana, filii Manei, filii Nasissim, filii Accusu, filii Agista, filii Azui, filii Favon, filii Phasalon, 32 filii Meedda, filii Phusa, filii Caree, filii Barcus, filii Saree, filii Coësi, filii Nasith, filii Agisti, filii Pedon. 33 Salomon filii ejus, filii Asophot, filii Phasida, filii Celi, filii Dedon, filii Gaddahel, filii Sephegi, 34 filii Aggia, filii Sachareth, filii Sabathen, filii Caroneth, filii Malsith, filii Amæ, filii Sasus, filii Addus, filii Suba, filii Eura, filii Rahotis, filii Phasphat, filii Malmon. 35 Omnes sacro servientes, et pueri Salomonis, quadringenti octoginta duo. 36 Hi sunt filii qui ascenderunt a Thelmela, Telharsa : principes eorum, Carmellam, et Careth : 37 et non poterant edicere civitates suas, et progenies suas, quemadmodum sint ex Israël. Filii Dalari, filii Tubal, filii Nechodaici, 38 ex sacerdotibus qui fungebantur sacerdotio : et non sunt inventi filii Obia, filii Achisos, filii Addin, qui accepit uxorem ex filiabus Phargeleu : 39 et vocati sunt nomine ejus, et horum quæsita est generis scriptura in pædatura, et non est inventa, et prohibiti sunt sacerdotio fungi. 40 Et dixit illis Nehemias et Astharas, Ne participentur sancta, donec exurgat pontifex doctus in ostensionem et veritatem. 41 Omnis autem Israël erat exceptis servis et ancillis, quadraginta duo millia trecenti quadraginta. 42 Servi horum et ancillæ, septem millia trecenti triginta septem. Cantores et cantatrices, ducenti sexaginta quinque. 43 Cameli, quadringenti triginta quinque. Equi septem millia triginta sex. Muli, ducenta millia quadraginta quinque. Subjugalia, quinque millia viginti quinque. 44 Et de præpositis ipsis per pagos, dum venirent in templum Dei, quod erat in Jerusalem, innovare et suscitare templum in loco suo, secundum suam virtutem : 45 et dari in templum thesaurum operum sacrum auri mnas duodecim millia, et mnas argenti quinque millia, et stolas sacerdotales centum. 46 Et habitaverunt Sacerdotes et Levitæ, et qui exierant de plebe in Jerusalem et in regione, et sacri cantores, et ostiarii, et omnis Israël in regionibus suis. 47 Instante autem septimo mense, cumque essent filii Israël unusquisque in suis rebus, convenerunt unanimes in atrium, quod erat ante januam Orientalem. 48 Et stantes Jesus filius Josedec, et fratres ejus sacerdotes, et Zorobabel filius Salathiel, et hujus fratres, paraverunt altare, 49 ut offerrent super illud holocautomata, secundum quæ in libro Moysi hominis Dei scripta sunt. 50 Et convenerunt ibi ex aliis nationibus terræ, et erexerunt sacrarium in loco suo omnes gentes terræ, et offerebant hostias, et holocautomata Domino matutina. 51 Et egerunt scenopegiam, et diem solemnem, sicut præceptum est in lege : et sacrificia quotidie, sicut oportebat : 52 et post hæc oblationes institutas, et hostias sabbathorum, et neomeniarum, et dierum solemnium omnium sanctificatorum. 53 Et quotquot vovebant Domino a neomenia septimi mensis, cœperunt hostias offerre Deo, et templum Domini nondum erat ædificatum. 54 Et dederunt pecuniam lapidariis et fabris, et potum et pabula cum gaudio. 55 Et dederunt carra Sidoniis, et Tyriis, ut transveherent illis de Libano trabes cedrinas, et facerent rates in Joppe portu, secundum decretum quod scriptum erat eis a Cyro rege Persarum. 56 Et in secundo anno venientes in templum Dei in Jerusalem, mense secundo inchoavit Zorobabel filius Salathiel, et Josue filius Josedec, et fratres ipsorum, et sacerdotes et Levitæ, et omnes qui venerant de captivitate in Jerusalem : 57 et fundaverunt templum Dei novilunio secundi mensis secundi anni cum venissent in Judæam et Jerusalem. 58 Et statuerunt Levitas a viginti annis, super opera Domini: et stetit Jesus et filius ejus, et fratres omnes Levitæ conspirantes, et executores legis, facientes opera in domo Domini. 59 Et steterunt sacerdotes habentes stolas cum tubis : et Levitæ filii Asaph, habentes cymbala, 60 collaudantes Dominum, et benedicentes secundum David regem Israël. 61 Et cantabant canticum Domino, quoniam dulcedo ejus, et honor in sæcula super omnem Israël. 62 Et omnis populus tuba cecinerunt, et proclamaverunt voce magna, collaudantes Dominum in suscitatione domus Domini. 63 Et venerunt ex sacerdotibus et Levitis, et præsidentibus secundum pagos senioribus, qui viderant pristinam domum : 64 et ad hujus ædificationem cum clamore et planctu magno, et multi cum tubis et gaudio magno : 65 in tantum ut populus non audiret tubas propter planctum populi. Turba enim erat tubis canens magnifice, ita ut longe audiretur. 66 Et audierunt inimici tribus Judæ, et Benjamin, et venerunt scire quæ esset vox tubarum. 67 Et cognoverunt quoniam qui erant ex captivitate, ædificant templum Domino Deo Israël. 68 Et accedentes ad Zorobabel et Jesum, præpositos pagorum, dixerunt eis, Ædificabimus una vobiscum : 69 Similiter enim audivimus Dominum vestrum, et ipsi pariter incedimus a diebus Asbazareth regis Assyriorum, qui transmigravit nos huc. 70 Et dixit illis Zorobabel, et Jesus, et principes pagorum Israël, 71 Non est nobis et vobis ædificare domum Dei nostri. Nos enim soli ædificabimus Domino Israël secundum ea quæ præcepit nobis Cyrus rex Persarum. 72 Gentes autem terræ incumbentes his qui sunt in Judæa, et levantes opus ædificationis et insidias, et populos adducentes prohibebant eos ædificare, 73 et aggressuras exercentes impedierunt, ne consummaretur ædificium omni tempore vitæ Cyri regis, et protraxerunt structuram per biennium usque ad Darii regnum.
Caput 6[recensere]
1 In secundo autem anno regni Darii prophetavit Aggæus, et Zacharias filius Addin prophetæ apud Judæam et Jerusalem in nomine Dei Israël super eos. 2 Tunc stans Zorobabel filius Salathiel, et Jesus filius Josedech, inchoaverunt ædificare domum Domini, quæ est in Jerusalem : 3 cum adessent eis prophetæ Domini, et adiuvarent eos. In ipso tempore venit ad illos Sisennes subregulus Syriæ, et Phœnicis, et Satrabuzanes, et sodales ejus, 4 et dixerunt eis, Quo præcipiente vobis domum hanc ædificatis, et tectum istud, et alia omnia perficitis ? et qui sunt structores qui hæc ædificant ? 5 Et habuerunt gratiam visitatione facta super eos, qui erant ex captivitate a Domino seniores Judæorum. 6 et non sunt impediti ædificare, donec significaretur Dario de omnibus istis, et responsum acciperetur. 7 Exemplum epistolæ, quam miserunt Dario. Sisennes subregulus Syriæ, et Phœnicis, et Satrabuzanes, et sodales ejus in Syria, et Phœnice præsides, regi Dario salutem. 8 Omnia nota sint domino regi, quod cum venissemus in regionem Judææ, et introissemus in Jerusalem, invenimus ædificantes domum Dei magnam : 9 et templum ex lapidibus politis, et magnis et pretiosis materiis in parietibus, 10 et opera ilia instanter fieri, et suffragare, et prosperare in manibus eorum, et in omni gloria, quam diligentissime perfici. 11 Tunc interrogavimus seniores, dicentes, Quo permittente vobis ædificatis domum istam, et opera hæc fundatis ? 12 Ideo autem interrogavimus eos, ut notum faceremus tibi homines et præpositos, et nominum scripturam præpositorum postulavimus illos. 13 At illi responderunt nobis, dicentes, Nos sumus servi Domini, qui fecit cælum et terram, 14 et ædificabatur hæc domus ante annos istos multos a rege Israël magno et fortissimo, et consummata est. 15 Et quoniam patres nostri exacerbantes erant et peccaverunt in Deum Israël, tradidit eos in manus Nabuchodonosor regis Babyloniæ, regis Chaldæorum, 16 et domum istam demolientes incenderunt, et populum captivum duxerunt in Babylonem. 17 In primo anno regnante Cyro rege Babyloniæ, scripsit Cyrus rex domum hanc ædificare, 18 et illa sacra vasa aurea, et argentea, quæ extulerat Nabuchodonosor de domo quæ est in Jerusalem, et consecraverat ea in suo templo, rursus protulit ea Cyrus rex de templo quod erat in Babylonia, et tradita sunt Zorobabel, et Salmanasaro subregulo : 19 Et præceptum est eis ut offerrent hæc vasa, et reponerent in templo quod erat in Jerusalem, et ipsum templum Dei ædificare in loco suo. 20 Tunc Salmanasarus subjecit fundamenta domus Domini, quæ est in Jerusalem : et exinde usque nunc ædificatur, et non accepit consummationem. 21 Nunc ergo si judicatur a te o rex, perquiratur in regalibus bibliothecis Cyri regis, quæ sunt in Babylonia : 22 et si inventum fuerit consilio Cyri regis cœptam esse structuram domus Domini, quæ est in Jerusalem, et judicatur a Domino rege nostro, scribat de his nobis. 23 Tunc Darius rex præcepit inquiri in bibliothecis : et inventus est in Ecbathanis oppido, quod est in media regione locus unus, in quo scripta erant ista : 24 Anno primo regnante Cyro, rex Cyrus præcepit domum Domini quæ est in Jerusalem ædificare, ubi incendebant igni assiduo, 25 cujus altitudo sit cubitorum decem, et latitudo cubitorum sexaginta, quadratum lapidibus politis tribus, et meniano ligneo ejusdem regionis, et meniano uno novo, et impendia dari de domo Cyri regis : 26 et sacra vasa domus Domini tam aurea quam argentea, quæ extulit Nabuchodonosor in domum Domini, quæ est in Jerusalem, ubi erant posita, ut ponantur illic : 27 et præcepit curam agere Sisennem subregulum Syriæ, et Phœnicis, et Satrabuzanem, et sodales ejus, et qui ordinati erant in Syria et Phœnice præsides, ut abstinerent se ab eodem loco. 28 Et ego quoque præcepi in totum ædificare : et prospexi, ut adiuvent eos qui sunt ex captivitate Judæorum, donec consummetur templum ædis Domini : 29 et a vexatione tributorum Cœlesyriæ et Phœnicis, diligenter quantitatem dari his hominibus ad sacrificium Domini, Zorobabel præfecto, ad tauros, et arietes, et agnos, 30 similiter autem et frumentum, et sal, et vinum, et oleum instanter per singulos annos, prout sacerdotes qui sunt in Jerusalem, dictaverunt consumi quotidie sine ulla dilatione, 31 ut offerantur libationes summo Deo pro rege et pueris ejus, et orent pro ipsorum vita : 32 et denuncietur, ut quicumque transgressi fuerint aliquid ex his quæ scripta sunt, aut spreverint, accipiatur lignum de suis propriis, et suspendantur, et bona ipsorum regi ascribantur. 33 Propterea et Dominus, cujus nomen invocatum est ibi, exterminet omnem regem et gentem, qui manum suam extenderit prohibere, aut male tractare domum Domini illam quæ est in Jerusalem. 34 Ego Darius rex decrevi quam diligentissime secundum hæc fieri.
Caput 7[recensere]
1 Tunc Sisennes subregulus Cœlesyriæ, et Phœnicis, et Satrabuzanes, et sodales obsecuti his, quæ a Dario rege erant decreta, 2 insistebant sacrosanctis operibus diligentissime, cooperantes cum senioribus Judæorum principibus Syriæ. 3 et prosperata sunt sacrosancta opera prophetantibus Aggæo et Zacharia prophetis. 4 Et consummaverunt omnia per præceptum Domini Dei Israël, et ex consilio Cyri, et Darii, et Artaxerxis regis Persarum. 5 Et consummata est domus nostra usque ad tertiam et vicesimam diem mensis Adar, sexto anno Darii regis. 6 Et fecerunt filii Israël et sacerdotes et Levitæ, et ceteri qui erant ex captivitate, qui appositi sunt secundum ea quæ scripta sunt in libro Moysi. 7 Et obtulerunt in dedicationem templi Domini, tauros centum, arietes ducentos, agnos quadringentos. 8 Et hœdos pro peccatis universi Israël, duodecim, secundum numerum tribuum Israël. 9 Et steterunt sacerdotes et Levitæ amicti stolis per tribus super omnia opera Domini Dei Israël secundum librum Moysi, et ostiarii per singulas januas. 10 Et egerunt filii Israël cum his qui erant ex captivitate, illud Phase quartadecima luna mensis primi, quando sanctificati sunt sacerdotes et Levitæ. 11 Omnes filii captivitatis non sunt simul sanctificati, quia Levitæ omnes simul sanctificati sunt. 12 Et immolaverunt Phase universi filii captivitatis, et fratribus suis sacerdotibus, et sibimetipsis. 13 Et manducaverunt filii Israël, qui erant ex captivitate omnes qui remanserant ab omnibus execrationibus gentium terræ quærentes Dominum, 14 et celebraverunt diem festum azymorum septem diebus epulantes in conspectu Domini, 15 quoniam convertit consilium regis Assyriorum in eos, confortare manus eorum ad opera Domini Dei Israël.
Caput 8[recensere]
1 Et post hunc regnante Artaxerxe Persarum rege, accessit Esdras filius Azariæ, filii Helciæ, filii Solome, 2 filii Sadoc, filii Achitob, filii Ameri, filii Azahel, filii Bocci, filii Abisue, filii Phinees, filii Eleazari, filii Aaron primi sacerdotis : 3 hic Esdras ascendit de Babylonia, cum esset scriba et ingeniosus in lege Moysi, quæ data est a Domino Deo Israël docere et facere. 4 Et dedit ei rex gloriam, quod invenisset gratiam in omni dignitate et desiderio in conspectu ejus. 5 Et ascenderunt simul cum ipso ex filiis Israël, et sacerdotibus et Levitis, et sacris cantoribus templi, et ostiariis, et servis templi in Jerusalem. 6 Anno septimo regnante Artaxerxe, in quinto mense, hic annus septimus est regni, exeuntes de Babylonia novilunio quinti mensis, 7 venerunt Jerosolymam juxta præceptum illius secundum prosperitatem itineris a Domino ipsorum datam eis. 8 In his enim Esdras magnam disciplinam obtinebat, ne prætermitteret quidquam eorum, quæ essent ex lege Domini et præceptis, et docendo universum Israël omnem justitiam et judicium. 9 Accedentes autem, qui scribebant scripta Artaxerxis regis tradiderunt scriptum quod obvenerat ab Artaxerxe rege ad Esdram sacerdotem, et lectorem legis Domini, cujus exemplum subjectum est. 10 Rex Artaxerxes Esdræ sacerdoti, et lectori legis Domini salutem. 11 Humanior ego judicans in beneficiis, præcepi eis qui desiderant ex gente Judæorum sua sponte, et ex sacerdotibus et Levitis, qui sunt in regno meo, comitari tecum in Jerusalem. 12 Si qui ergo cupiunt ire tecum, conveniant, et proficiscantur sicut placuit mihi et septem amicis meis consiliariis, 13 ut visitent ea quæ aguntur secundum Judæam et Jerusalem, observantes sicut habes in lege Domini, 14 et ferant munera Domino Deo Israël, quæ vovi ego et amici Jerusalem, et omne aurum et argentum, quod inventum fuerit in regione Babyloniæ Domino in Jerusalem cum illo, 15 quod est donatum pro ipsa gente in templum Domini eorum quod est in Jerusalem, ut colligatur hoc aurum et argentum ad tauros, et arietes, et agnos, et hœdos, et quæ his sunt congruentia, 16 ut offerant hostias Domino super altare Domini ipsorum quod est in Jerusalem. 17 Et omnia quæcumque volueris cum fratribus tuis facere auro et argento, perfice pro voluntate tua secundum præceptum Domini Dei tui : 18 et sacrosancta vasa, quæ data sunt tibi ad opera domus Domini Dei tui, quæ est in Jerusalem : 19 et cetera quæcumque tibi subvenerint ad opera templi Dei tui, dabis de regali gazophylacio : 20 cum volueris cum fratribus tuis facere auro et argento, perfice secundum voluntatem Domini. 21 Et ego quidem rex Artaxerxes præcepi custodibus thesaurorum Syriæ et Phœnicis, ut quæcumque scripserit Esdras sacerdos, et lector legis Domini, diligenter detur ei usque ad argenti talenta centum, similiter et auri : 22 et usque ad frumenti modios centum, et vini amphoras centum, et alia quæcumque abundant sine taxatione. 23 Omnia secundum legem Dei fiant Deo altissimo, ne forte exurgat ira in regno regis, et filii, et filiorum ejus. 24 Vobis autem dicitur, ut omnibus sacerdotibus et Levitis, et sacris cantoribus, et servis templi, et scribis templi hujus, 25 nullum tributum, neque ulla alia indictio irrogetur, nec habeat quisquam potestatem objicere eis quicquam. 26 Tu autem Esdra secundum sapientiam Dei constitue judices et arbitros in tota Syria, et Phœnice : et omnes qui legem Dei tui non noverunt, doce : 27 ut quotquot transgressi fuerint legem, diligenter plectantur sive morte, sive cruciatu, sive etiam pecuniæ mulctatione vel abductione. 28 Et dixit Esdras scriba : Benedictus Deus patrum nostrorum, qui dedit hanc voluntatem in cor regis, clarificare domum suam, quæ est in Jerusalem, 29 et me honorificavit in conspectu regis, et consiliariorum, et amicorum, et purpuratorum ejus. 30 et ego constans animo factus sum secundum opitulationem Domini Dei mei, et congregavi ex Israël viros, ut simul ascenderent mecum. 31 Et hi sunt præpositi secundum suas patrias, et principatus portionales eorum qui mecum ascenderunt de Babylonia in regno Artaxerxis. 32 Et ex filiis Phares, Gersomus : ex filiis Siemarith, Amenus : filiorum David, Acchus filius Sceciliæ : 33 ex filiis Phares, Zacharias, et cum eo reversi sunt viri centum quinquaginta : 34 ex filiis ductoris Moabilionis, Zaræi, et cum ipso viri ducenti quinquaginta : 35 ex filiis Zachues, Jechonias Zecholei, et cum ipso viri ducenti quinquaginta : 36 ex filiis Sala, Maasias Gothollæ, et cum ipso viri septuaginta : 37 ex filiis Saphatiæ, Zarias, Micheli, et cum ipso viri octoginta : 38 ex filiis Job, Abdias Jeheli, et cum ipso viri ducenti duodecim : 39 ex filiis Baniæ, Salimoth, filius Josaphiæ, et cum ipso viri centum sexaginta : 40 ex filiis Beer, Zacharias Bebei, et cum ipso viri ducenti octo : 41 ex filiis Ezead, Joannes, Eccetan, et cum ipso viri centum decem : 42 ex filiis Adonicam ipsis postremis, et hæc sunt nomina eorum, Eliphalam filius Gebel, et Semeias, et cum ipso viri septuaginta. 43 Et congregavi eos ad fluvium qui dicitur Thia, et metati fuimus illic triduo, et recognovi eos. 44 Et ex filiis sacerdotum et Levitarum non inveni illic. 45 Et misi ad Eleazarum, et Eccelon, et Masman, et Maloban, et Enaathan, et Samea, et Joribum, Nathan, Enuagam, Zachariam, et Moso-lamum ipsos ductores et peritos : 46 et dixi eis ut venirent ad Loddeum, qui erat apud locum gazophylacii. 47 Et mandavi eis ut dicerent Loddeo, et fratribus ejus, et illis qui erant in gazophylacio, ut mitterent nobis eos qui sacerdotio fungerentur in domo Domini Dei nostri : 48 et adduxerunt nobis secundum manum validam Domini Dei nostri viros peritos : ex filiis Moholi, filii Levi, filii Israël, Sebebian, et filios et fratres, qui erant decem et octo : 49 Asbiam, et Amin ex filiis filiorum Chananæi, et filii eorum viri viginti. 50 Et ex his qui templo serviebant, quos dedit David, et ipsi principes ad operationem Levitis templo servientium ducenti viginti. Omnia nomina significata sunt in scripturis. 51 Et vovi illic jejunium juvenibus in conspectu Dei, ut quærerem ab eo bonum iter nobis, et qui nobiscum erant et filiis, et pecoribus propter insidias. 52 Erubui enim petere a rege pedites et equites in comitatu, tutelæ gratia contra adversarios nostros. 53 Diximus enim regi, quoniam virtus Domini erit cum eis qui inquirunt eum in omni affectu. 54 Et iterum deprecati sumus Dominum Deum nostrum secundum hæc : quem et propitium habuimus, et compotes facti sumus Deo nostro. 55 Et separavi ex plebis præpositis, et sacerdotibus templi viros duodecim, et Sedebiam, et Asannam, et cum eis ex fratribus eorum viros decem : 56 et appendi eis aurum et argentum et vasa sacerdotalia domus Dei nostri, quæ donaverat rex, et consiliarii ejus, et principes, et omnis Israël. 57 Et cum appendissem, tradidi argenti talenta centum quinquaginta, et vasa argentea talentorum centum, et auri talenta centum, 58 et vasorum aureorum septies viginti, et vasa ærea de bono æramento splendentia, duodecim, auri speciem reddentia. 59 et dixi eis : Et vos sancti estis Domino, et vasa sunt sancta, et aurum, et argentum votum est Domino Deo patrum nostrorum. 60 Vigilate et custodite, donec tradatis ex plebis præpositis, et sacerdotibus et Levitis, et principibus civitatum Israël in Jerusalem, in pastophorio domus Dei nostri. 61 Et hi qui susceperunt sacerdotes et Levitæ aurum et argentum et vasa, intulerunt in Jerusalem in templum Domini. 62 Et promovimus a fluvio Thia, die duodecima mensis primi, usquequo introivimus in Jerusalem. 63 Et cum factus fuisset tertius dies, quarta autem die ponderatum aurum, et argentum traditum est in domo Domini Dei nostri, Marimoth filio Jori sacerdoti : 64 et cum ipso erat Eleazar filius Phinees : et erant cum ipsis Josadus filius Jesu, et Medias, et Banni filius Levitæ ad numerum, et ad pondus universa. 65 Et scriptum est pondus ipsorum eadem hora. 66 Qui autem venerunt ex captivitate, obtulerunt sacrificium Domino Deo Israël, tauros duodecim pro omni Israël, arietes octoginta sex, 67 agnos septuaginta duos, hircos pro peccato duodecim, et pro salute vaccas duodecim, omnia in sacrificium Domini. 68 Et relegerunt præcepta regis regalibus dispensatoribus, et subregulis Cœlesyriæ, et Phœnicis : et honorificaverunt gentem, et templum Domini. 69 Et consummatis his, accesserunt ad me præpositi, dicentes : Non segregaverunt genus Israël, et principes, et sacerdotes, et Levitæ, 70 et alienigenæ gentes et nationes terræ immunditias suas a Chananæis, et Hethæis, et Pherezæis, et Jebuzæis, et Moabitis, et Ægyptiis, et Idumæis. 71 coniuncti enim sunt filiabus eorum et ipsi, et filii eorum. Et mistum est semen sanctum alienigenis gentibus terræ : et participes erant præpositi, et magistratus iniquitatis ejus ab initio ipsius regni. 72 Et mox ut audivi ista, conscidi vestimenta et sacram tunicam : et lacerans capillos capitis, et barbam, sedi dolens et mœstus. 73 Et convenerunt quotquot tunc movebantur in verbo Domini Dei Israël, ad me lugentem super iniquitatem istam, et sedebam tristis usque ad sacrificium vespertinum. 74 Et consurgens a jejunio, conscissa habens vestimenta et sacram tunicam, ingeniculans, et extendens manus ad Dominum, 75 dicebam : Domine confusus sum, et reveritus sum ante faciem tuam. 76 Peccata enim nostra multiplicata sunt super capita nostra, et iniquitates nostræ exaltatæ sunt usque ad cælum. 77 Quoniam a temporibus patrum nostrorum sumus in magno peccato usque ad diem hunc. 78 Et propter peccata nostra, et patrum nostrorum sumus traditi cum fratribus nostris, et cum sacerdotibus nostris, regibus terræ in gladium et captivitatem, et deprædationem cum confusione usque in hodiernum diem. 79 Et nunc quantum est hoc quod contigit nobis misericordia abs te Domine Deus, et relinque nobis radicem, et nomen in locum sanctificationis tuæ, 80 detegere luminare nostrum in domo Domini Dei nostri, dare nobis cibum in omni tempore servitutis nostræ. 81 Et cum serviremus, non fuimus derelicti a Domino Deo nostro, sed constituit nos in gratia, ponens nobis reges Persarum dare cibum, 82 et clarificare templum Domini Dei nostri, et ædificare deserta Sion, dare nobis stabilitatem in Judæa, et Jerusalem. 83 Et nunc quid dicimus Domine habentes hæc ? Transgressi enim sumus præcepta tua, quæ dedisti in manus puerorum tuorum prophetarum, 84 dicens : Quoniam terra, in quam introistis possidere hæreditatem ejus, terra polluta est coinquinationibus alienigenarum terræ, et immunditiæ illorum repleverunt eam totam immunditia sua. 85 Et nunc filias vestras non coniungetis filiis eorum, et filias eorum non accipietis filiis vestris, 86 et non inquiretis pacem habere cum illis omni tempore, ut invalescentes manducetis optima terræ, et hæreditatem distribuatis filiis vestris usque in ævum. 87 Et quæ contingunt nobis, omnia fiunt propter opera nostra maligna, et magna peccata nostra. 88 Et dedisti nobis talem radicem, et rursum reversi sumus transgredi legitima tua, uti commisceremur immunditiæ alienigenarum gentium terræ hujus. 89 Nonne irasceris nobis perdere nos, quoadusque non relinquatur radix et nomen nostrum ? 90 Domine Deus Israël verax es. Derelicta est enim radix usque in hodiernum diem. 91 Ecce, nunc sumus in conspectu tuo in iniquitatibus nostris. Non est enim adhuc stare ante te in his. 92 Et cum adorando confiteretur Esdras, flens, humi prostratus ante templum, congregati sunt ante eum ex Jerusalem turma magna valde, viri, et mulieres, et juvenes, et juvenculæ. Fletus enim erat magnus in ipsa multitudine. 93 Et cum clamasset, Jechonias Jeheli ex filiis Israël, dixit Esdræ : Nos in Dominum peccavimus, quod collocavimus nobis in matrimonium mulieres alienigenas ex gentibus terræ. 94 Et nunc es super omnem Israël. In his ergo sit jusjurandum a Domino expellere omnes uxores nostras quæ ex alienigenis sunt cum filiis earum. 95 Sicut tibi decretum est a majoribus secundum legem Domini exurgens explica. 96 Ad te enim spectat negocium, et nos tecum sumus : viriliter fac. 97 Et exurgens Esdras adiuravit principes sacerdotum et Levitas, et omnem Israël facere secundum hæc, et juraverunt.
Caput 9[recensere]
1 Et exurgens Esdras ab ante atrium templi, abiit in pastophorium Jonathæ filii Nasabi, 2 et hospitatus illic non gustavit panem, nec aquam bibit super iniquitatem multitudinis. 3 Et facta est prædicatio in omni Judæa, et in Jerusalem omnibus qui erant ex captivitate in Jerusalem congregati, 4 ut quicumque non occurrerit biduo, vel triduo diei secundum judicium assidentium seniorum, tollerentur facultates suæ, et ipse alienus judicaretur a multitudine captivitatis. 5 Et congregati sunt omnes qui erant ex tribu Juda, et Benjamin in tribus diebus in Jerusalem. Hic mensis est nonus, dies mensis vicesimus. 6 Et sedit omnis multitudo in area templi trementes, propter hyemem præsentem. 7 Et exurgens Esdras, dixit illis : Vos inique fecistis collocantes vobis in matrimonium uxores alienigenas, ut adderetis ad peccata Israël. 8 Et nunc date confessionem, et magnificentiam Domino Deo patrum nostrorum : 9 et perficite voluntatem ipsius, et discedite a gentibus terræ, et ab uxoribus alienigenis. 10 Et clamavit omnis multitudo, et dixerunt voce magna : Sicut dixisti, faciemus. 11 Sed quoniam multitudo magna est, et tempus hybernum, et non possumus insubsidiati stare : et hoc opus non est nobis unius diei neque bidui : multum enim in his peccavimus : 12 stent præpositi multitudinis, et omnes qui nobiscum inhabitant, et quotquot habent uxores apud se alienigenas, 13 et assistant accepto tempore ex omni loco presbyteri, et judices usquequo solvant iram Domini negotii hujus. 14 Jonathas autem filius Ezeli, et Ozias Thecam susceperunt secundum hæc : et Bosoramus, et Levis, et Sabbathæus simul cooperati sunt cum illis. 15 Et steterunt secundum hæc omnia universi qui erant ex captivitate. 16 Et elegit sibi viros Esdras sacerdos principes magnos de patribus eorum secundum nomina : et consederunt novilunio mensis decimi examinare negotium istud. 17 Et determinatum est de viris qui habebant uxores alienigenas, usque ad neomeniam primi mensis, 18 et inventi sunt ex sacerdotibus permisti qui habebant alienigenas uxores. 19 Ex filiis Jesu filii Josedec, et fratribus ejus : Maseas, et Eliozerus, et Joribus, et Joadeus, 20 et iniecerunt manus ut expellerent uxores suas : et ad litandum in exorationem, arietem pro ignorantia sua. 21 et ex filiis Semmeri : Maseas et Esses et Jeelech, Azarias, 22 et ex filiis Fosere : Limosias, Hismaënis, et Nathanee, Jussio, Reddus, et Thalsas. 23 Et ex Levitis : Jorabdus, et Semeis, et Colnis, et Calitas, et Facteas, et Colvas, et Elionas. 24 Et ex sacris cantoribus, Eliasib, Zaccarus. 25 Et ex ostiariis : Salumus, et Tolbanes. 26 Et ex Israël : ex filiis Foro, Ozi, et Remias, et Geddias, et Melchias, et Michelus, Eleazarus, et Jammebias, et Bannas. 27 Et ex filiis Jolaman : Chamas, et Zacharias, et Jezrelus, et Joddius, et Erimoth, et Helias. 28 Et ex filiis Zathoim. Eliadas, et Liasumus, Zochias, et Larimoth, et Zabdis, et Tebedias. 29 Et ex filiis Zebes, Joannes, et Amanias, et Zabdias, et Emeus. 30 Et ex filiis Banni : Olamus, et Maluchus, et Jeddeus, et Jasub, et Azabus, et Jerimoth. 31 Et ex filiis Addin : Naathus, et Moosias, et Caleus, et Raanas, et Maaseas, et Mathathias, et Beseel, et Bonnus, et Manasses. 32 Et ex filiis Nuæ : Noneas, et Aseas, et Melchias, et Sameas, et Simon Benjamin, et Malchus, et Marras. 33 Et ex filiis Asom : Carianeus, Mathathias, et Bannus, et Eliphalach, et Manasses, et Semei. 34 Et ex filiis Banni : Jeremias, et Moadias, et Abramus, et Johel, et Baneas, et Pelias, et Jonas, et Marimoth, et Eliasib, et Mathaneus, et Eliasis, et Orizas, et Dielus, et Semedius, et Zambris, et Josephus. 35 et ex filiis Nobei : Idelus, et Mathathias, et Sabadus, et Zecheda, Sedmi, et Jessei, Baneas. 36 omnes isti coniunxerunt sibi uxores alienigenas, et dimiserunt eas cum filiis. 37 Et inhabitaverunt sacerdotes et Levitæ : et qui erant ex Israël in Jerusalem, et in tota una regione novilunio mensis septimi. Et erant filii Israël in commorationibus suis. 38 Et congregata est omnis multitudo simul in aream, quæ est ab oriente portæ sacræ : 39 et dixerunt Esdræ pontifici, et lectori, ut afferret legem Moysi, quæ tradita est a Domino Deo Israël. 40 Et attulit Esdras pontifex legem omni multitudini eorum a viro usque ad mulierem, et omnibus sacerdotibus audire legem novilunio mensis septimi. 41 Et legebat in area, quæ est ante sacram portam templi, a prima luce usque ad vesperam coram viris et mulieribus. Et dederunt omnes sensum ad legem. 42 Et stetit Esdras sacerdos, et lector legis super ligneum tribunal quod fabricatum erat. 43 Et steterunt ad eum Mathathias, et Samus, Ananias, Azarias, Urias, Ezechias, et Balsamus ad dexteram : 44 et ad sinistram Faldeus, Misaël, Malachias, Abusthas, Sabus, Nabadias, et Zacharias. 45 Et assumpsit Esdras librum coram omni multitudine : præsidebat enim in gloria in conspectu omnium. 46 Et cum absolvisset legem, omnes erecti steterunt : et benedixit Esdras Dominum Deum altissimum, Deum Sabaoth omnipotentem. 47 Et respondit omnis populus, Amen. Et elevatis sursum manibus procidentes in terram, adoraverunt Dominum. 48 Jesus, et Banaëus, et Sarebias, et Jaddinus, et Accubus, et Sabbathæus, et Calithes, et Azarias, et Joradus, et Ananias, et Philias Levitæ, 49 qui docebant legem Domini, et in multitudine legebant legem Domini, et præferebant singuli eos, qui intelligebant lectionem. 50 Et dixit Atharathes Esdræ pontifici, et lectori, et Levitis, qui docebant multitudinem, 51 dicens. Dies hic sanctus est Domino. Et omnes flebant, cum audissent legem. 52 Et dixit Esdras, Digressi ergo manducate pinguissima quæque et bibite dulcissima quæque et mittite munera his qui non habent. 53 Sanctus enim est hic dies Domini, et nolite mœsti esse. Dominus enim clarificabit vos. 54 Et Levitæ denunciabant in publico omnibus, dicentes : Dies hic sanctus est, nolite mœsti esse. 55 Et abierunt omnes manducare, et bibere, et epulari, et dare munera his qui non habebant, ut epularentur. Magnifice enim sunt exaltati verbis quibus edocti sunt. 56 Et congregati sunt universi in Jerusalem celebrare lætitiam, secundum testamentum Domini Dei Israël.