Pagina:Scriptores Minores Historiae Danicae Medii Aevi vol 1.djvu/21

E Wikisource
Haec pagina emendata est
15
CHRONICON ROSKILDENSE

utriusque gentis multiludinem ad fidem contraxit. Deinde mortuo[1] Lyudrico, Bremensi archiepiscopo, Liuduicus imperator, filius Liuduici, frater Lotarij et Karoli[2], Bremensem archiepiscopatum Ansgario concessit. Hoc regali munere confessor dei ualde gauisus in Daniam perrexit. Vbi regem Danorum, fratrem regis Haraldi, predictum Ericum, Christianissimum cum suo populo reddidit. Nam mortuo Haraldo[3] iste in regnum assumptus est. Hic primum ecclesiam Sleswich[4] erexit, data pariter sentencia[5], ut, quisquis esse uellet in regno suo, Christianus fieret.


II.[6] Interea Normanni Galliam demoliti per fluuios Ligerim, Secanam[7], Renum dederunt excursum. Quo timore compulsus rex Francie Karolus terram eis concessit ad habitandum[8], quam et hodie possident. Deinde Daniam aggressi Hericum regem interfecerunt. Quo mortuo[9] Hericus Puer in regnum leuatus est. De isto Herico Puero non minima[10] dubitacio est, utrum filius predicti Herici[11] fuerit an non. Qui mox super Christicolas efferatus sacerdotes expulit, ecclesias claudi precepit. Ad quem ueniens sanctus Ansgarius [non] intrepidus[12] crudelem tyrannum de feroci leone mansuetissimum conuertit in agnum, adeo ut ipse Christianitatem susciperet et suis omnibus per edictum Christianos fieri[13] mandaret. Tunc sacerdotes reuocati, ecclesie[14] sunt erecte et restaurate. Insuper apud Ripam basilica exstructa est, post Sleswich secunda.

  1. ↑ mortuo in marg. add. O imperator bis habet S, in quo si quid latet, altero loco imperatoris scribd. est.
  2. ↑ Lotharii S. Caroli O (item 13).
  3. ↑ ad m. Haraldo† in marg. S add. Stephanius: † A.C.DCCCXLVI. iste om. O.
  4. ↑ ſlesuic O, Sleswic S, atque eodem modo fere semper differunt inter se tres codices in sequentibus.
  5. ↑ sentencia: aliter Adamus: data pariter licencia, ut, quisquis vellet in regno suo, Christianus fieret; et hoc in Collectaneis Petrus Olai habet in marg. fol. 36v.
  6. ↑ Cap. II. Cfr. Adam. Brem. lib. I capp. 30-31. —
  7. ↑ Seqvanam, Rhenum S.
  8. ↑ abitandum K.
  9. ↑ ad mortuo† in marg. S add. Stephanius: †A.C.DCCCLVI.
  10. ↑ minimo K, sed corr. m. 1.
  11. ↑ Erici S.
  12. ↑ nõ intrepidus K; ñ intrepidus O, quæ scriptura fort. inde orta est, quod Adamus non trepidãs habet; certe non falsum est: intrepidus S, sed in marg. additum; in textum recepit H.
  13. ↑ fieri OS; fidei K.
  14. ↑ et ecclesie O.
Receptum de "https://la.wikisource.org/w/index.php?title=Pagina:Scriptores_Minores_Historiae_Danicae_Medii_Aevi_vol_1.djvu/21&oldid=178323"