 Gratulationes |
Ad Caietanum Golfierium  |
AD
FRANCISCUM BATTAGLINIUM ARCHIEP. BONON.
A
LEONE XIII
Anno mdccclxxxv
In purpuratorum Patrum Senatum adlectum
IDYLLIUM.
Purpureo, Pater alme, tuam praesignis amictu
O magnis merite ingreditor virtutibus urbem.
Non veluti intrabant devictis hostibus olim
Moenia, perfractis flagranti fulmine portis
Saeva duces saevumque daturi iura tyrannum,
Intras, pacifera frontem sed vinctus oliva
(Pugnacis quamvis nomen tibi praeferat omen)
Bella fugis, pacisque studes imponere morem.
Adiungi sibi te quanto properavit amore,
Tanto ardens studio tibi brachia Felsina pandit. 10
O magnis merite, ingreditor, virtutibus ostrum.
Aspice ducentes laetas sua pignora matres:
Ipse vocas: pueri, ad mea septa venite volentes,
Vos et alam dictis coelestibus atque linibo
Frontem addens dignas generoso milite vires.
Signa haec clara videns perterritus hostis abibit,
Sive quis incautis fallacia ponere tendat
Retia, sive paret certas torquere sagittas.
O magnis, merite, ingreditor, virtutibus ostrum.
Sic intras denso stipantibus agmine turmis 20
Qualis Iudeae divinus rura Magister
Lustrabat, vel qualis ovans solimaea revisit
Moenia, certatim clamantibus omnibus, euge!
Tu facilis nec pannosum fastidis egenum,
Et si quid quis peccavit miserescis, id unum
Mente tuens omnes ut opima ad pascua ducas.
O magnis merite, ingreditor, virtutibus ostrum.
Quin et oves errore viae per lustra vagantes
Quaeris et inventas pergratum onus accipis armo.
Pastorale pedum gestas quo pervigil agnos 30
Tutaris, rabidasque feras praesepibus arces.
Praestas ingenio exitium meditante luporum
Per tenebras qui pacato insidiantur ovili;
Nec sat, sed vulpes hominum sub pelle latentes,
Maius opus, retegis, deducere quae male certant
Herbosisque gregem pratis et fonte salubri.
O magnis merite, ingreditor, virtutibus ostrum.
Purpurea cernens populus te in veste nitentem,
Pastor, ait, viden? (est nam purpura sanguinis index)
Fundere pro grege non timidus cum sanguine vitam. 40
O tibi, mater, adhuc, infit, si vita maneret,
Qualia, viso hoc tentarent tibi gaudia pectus!
Forsan ades delapsa polo, nulloque vidente
Nobiscum Nati gaudes spectare triumphum;
Et matris de more, tuaeque nec immemor artis
Alloqueris Natum: «Frustra non, Nate, potestas
Tanta tibi, ast in multorum collata levamen.
Quos alii monitus dederint summusve magister
Scire mea haud refert, quod oves, puta, praeda luporum,
Quod prudens coluber simplexque imitanda columba est. 50
Longe alia, o Fili, tenerae sunt vota Parentis:
Ut sit opus rubram sordescere pulvere vestem,
Fer, Nate, auxilium miseris, quibus hoste periclum
Cum forti extremum, verbisque potentibus illos
Confirmans releva; inprimis id, Nate, memento.
Arte mihi hac meritus romanum diceris ostrum.»