 Pauli epistola ad Titum |
Jacobi epistola  |
Caput I
[recensere]Paulus argumentum humile hic tractans suo tamen more sublimis ad Deum evehitur. Fugitivum servum et furem Philemoni remittens, pro illo de precatur veniam: et graviter de aequitate christiana deprecatur.
1. Paulus, Jesu Christi vinctus, et Timotheus frater, Philemoni, caro amico, adiutorique nostro, 2. Et Appiae carissimae, et Archippo commilitoni nostro, et ecclesiae domus tuae, 3. Gratiam et pacem a Deo patre nostro, et Domino Jesu Christo. 4. Ago Deo meo gratias, semper tui mentionem faciens in meis supplicationibus, 5. Audiens, qua caritate et fide praeditus sis tum in Dominum Jesum, tum erga sanctos omnes 6. Quo ista liberalitate tuae in Christo Jesu collocatae fidei fiat, ut intelligatur, quantum sit in vobis boni 7. Magna quidem laetitia et consolatione adficimur ex caritate tua, quod sanctorum animi per te, frater, recreati sint. 8. Proinde quum magnam in Christo auctoritatem habeam imperandi tibi officium, 9. Propter caritatem potius rogo, talis ego, hoc est, Paulus senex, et nunc etiam Jesu Christi vinctus: 10. Te, inquam, rogo de meo filio, quem in meis vinculis genui, Onesimo, 11. Eo, qui tibi aliquando fuit inutilis, nunc et tibi et mihi utilis, quem dimisi. 12. Tu vero eum, hoc est, mei intimum recipe: 13. Quem ego volebam apud me retinere, ut mihi tua vice ministraret in evangelii vinculis: 14. Sed injussu tuo nihil volui facere, ut non coactum, sed voluntarium esset tuum beneficium. 15. Fortassis enim ideo ad tempus abfuit, ut eum reciperes aeternum: 16. Non jam ut servum, sed plus quam servum, fratrem etiam mihi carissimum, nedum tibi, et carnis et dominicae religionis nomine. 17. Quare si me socium habes, accipe eum ut me. 18. Quod si quid te laesit, aut tibi debet, id mihi imputato. 19. Ego Paulus scripsi mea manu,ego dissolvam: ut interim illud tibi non dicam, quod tu mihi etiam teipsum debes. 20. Age frater, gratificare mihi per Dominum, recrea meum animum per Dominum. 21. Fretus obedientia tua scripsi tibi: sciens, te plus etiam, quam peto, facturum. 22. Praeterea para mihi hospitium. Spero enim fore, ut vobis per vestras preces condoner. 23. Salutant te Epaphras, meae in Christo Jesu captivitatis comes: 24. Et Marcus, Aristarchus, Demas, Lucas, collegae mei. 25. Domini nostri Jesu Christi favor adsit animis vestris: Amen.
- Missa est Roma, per Onesimum servum