Jump to content

Carmina (Horatius)/Liber I/Carmen XXV

Unchecked
E Wikisource

Quintus Horatius Flaccus
Carmina
Liber I
Carmen XXV
23 a.Ch.n.

 I, XXIV I, XXVI 


Parcius iunctas quatiunt fenestras
Iactibus crebris iuvenes protervi,
Nec tibi somnos adimunt, amatque
          Ianua limen,

Quae prius multum facilis movebat
Cardines. Audis minus et minus iam:
‘Me tuo longas pereunte noctes,
          Lydia, dormis?’

Invicem moechos anus arrogantis
Flebis in solo levis angiportu,
Thracio bacchante magis sub inter-
          lunia vento,

Cum tibi flagrans amor et libido,
Quae solet matres furiare equorum,
Saeviet circa iecur ulcerosum,
          Non sine questu,

Laeta quod pubes hedera virenti
Gaudeat pulla magis atque myrto,
Aridas frondes hiemis sodali
          Dedicet Hebro.

 I, XXIV I, XXVI 
Receptum de "https://la.wikisource.org/wiki/Carmina_(Horatius)/Liber_I/Carmen_XXV"