Carmina (Catullus)/12

E Wikisource
Jump to navigation Jump to search

Fairytale left blue.png Carmen 11 Carmen 13 Fairytale right blue.png

Marrucine Asini, manu sinistra
Non belle uteris in ioco atque uino:
Tollis lintea neglegentiorum.
Hoc salsum esse putas? Fugit te, inepte!
Quamuis sordida res et inuenusta est.
Non credis mihi? Crede Pollioni
Fratri, qui tua furta uel talento
Mutari uelit; est enim leporum
Disertus puer ac facetiarum.
Quare aut hendecasyllabos trecentos
Exspecta, aut mihi linteum remitte,
Quod me non mouet aestimatione,
Verum est mnemosynum mei sodalis.
Nam sudaria Saetaba ex Hiberis
Miserunt mihi muneri Fabullus
Et Veranius: haec amem necesse est
Ut Veraniolum meum et Fabullum.

Fairytale left blue.png Carmen 11 Carmen 13 Fairytale right blue.png