Jump to content

Carmina (Horatius)/Liber I/Carmen V

Unchecked
E Wikisource

Quintus Horatius Flaccus
Carmina
Liber I
Carmen V
23 a.Ch.n.

 I, IV I, VI 


Quis multa gracilis te puer in rosa
Perfusus liquidis urget odoribus
    Grato, Pyrrha, sub antro?
        Cui flavam religas comam,

Simplex munditiis? Heu quotiens fidem
Mutatosque deos flebit et aspera
    Nigris aequora ventis
        Emirabitur insolens,

Qui nunc te fruitur credulus aurea,
Qui semper vacuam, semper amabilem
    Sperat, nescius aurae
        Fallacis. Miseri, quibus

Intentata nites. Me tabula sacer
Votiva paries indicat uvida
    Suspendisse potenti
        Vestimenta maris deo.

 I, IV I, VI 
Receptum de "https://la.wikisource.org/wiki/Carmina_(Horatius)/Liber_I/Carmen_V"