Carmina (Horatius)/Liber III/Carmen XXVI

E Wikisource
Jump to navigation Jump to search

Liber III
Carmen XXVI
23 a.Ch.n.
Fairytale left blue.png III, XXV III, XXVII Fairytale right blue.png


Vixi puellis nuper idoneus
Et militavi non sine gloria;
    Nunc arma defunctumque bello
        Barbiton hic paries habebit,

Laevum marinae qui Veneris latus
Custodit. Hic, hic ponite lucida
    Funalia et vectis et arcus
        Oppositis foribus minacis,

O quae beatam diva tenes Cyprum et
Memphin carentem Sithonia nive,
    Regina, sublimi flagello
        Tange Chloen semel arrogantem.

Fairytale left blue.png III, XXV III, XXVII Fairytale right blue.png