 De re metallica |
Praefatio  |
Henry par la grace de Dieu roy de France.
Aux Preuost de Paris, Bailly de Roen, Seneschaulx de Lyon, Tholose, & Poictou. Et à tous noz autres iusticiers & officiers ou à leurs lieutenans salut. Receue auons l’hũble supplicacion de noz amys & feaulx Ieroſme Frobenne & Nicolas l’Eueſque marchãs, libraires, & bourgeoys de la uille de Basle, l’un des cantons de noz alliez confederez & bons cõperes les Souyſſes, contenant quilz auroyent recouuert pluſieurs liures non encores ueuz & entre autres un intitulé GEORGII AGRICOLAE opera omnia, Pour lequel liure recouurer & imprimer il leur à conuenu & conuiendra faire des grans fraiz & deſpens, & doubtent que les libraires & imprimeurs, ne facent ſi toſt que leſdicts expoſans aurõt publié ledict liure iceluy imprimer, qui ſeroit leur oſter tout moyen de ſe pouuoyr rembourſer de leurſdicts fraiz & miſes, & de receuoir le fruict quilz eſperent de leur labeur. A ceſte cauſe ilz nous ont humblement requis leur uouloir ſurce pouruoir de noſtre remede conuenable. PARQUOY nous ce conſideré, uoulant fauorablement traicter leſdicts expoſans en ceſt endroit, A iceulx auõs permis & octroye, permettons & octroyons par ces preſentes uoulons & nous plaiſt de noz grace ſpeciale, plaine puiſſance & auctorite Royal, qu’ilz puiſſent & leur loyſe imprimer, ou faire imprimer, & mettre en uente le liure deſuſdict sans ce que pendant & durant le temps & terme de ſix ans enſuyuans, à compter du iour & datte que ledict liure ſera acheué d’imprimer, ou faire imprimer, & mettre en uente le liure deſuſdict ſans ce que pendant & durant le temps & terme de ſix ans enſuyuans, à compter du iour & datte que ledict liure sera acheué d’imprimer, nul autre libraire ou imprimeur de nosdicts Royaume, pays, terres & ſeigneuries de nostre obeiſſance puiſſent imprimer, ou faire imprimer, ny en partie ny entier, ne mettre, ne exposer en uente ſans le congé & permißion deſdicts expoſans. Et ce ſur peine de cõfiſcation dudict liure, & d’amende arbitraire à nous à applicquer. SI VOUS MANDONS, & à chaſchun de uous, ſi cõme à luy appartiendra que de noz preſentes permißion, conceßion, & octroy, & de leffect & contenu en icelles. Vous faictes, permettez & ſouffrez leſdicts expoſans iouyr & uſer plainement & plaiſiblement ſans en ce le mettre ou donner, ne ſouffrir eſtre faict, mis, ou donné aucun empeſchement au contraire, lequel ſi faict, mis, ou donné leur eſtoyent faictes, mettre incontinent & ſans delay à plaine & entiere deliurance au premier eſtat & deu, Car tel eſt noſtre plaiſir, Nonobſtant quelzconques lettre à ce contraire. Donné à Paris le XVIII. iour de Feurier, l’An mil cinq cens cinquante troys, & de noſtre Regne le ſeptieſme.