 I |
III—Oratio  |
Puer, eia, surge et calceos
et linteam da sindoneum.
da, quidquid est, amictui
quod iam parasti, ut prodeam.
da rore fontano abluam 5
manus et os et lumina.
pateatque, fac, sacrarium
nullo paratu extrinsecus:
pia verba, vota innoxia,
rei divinae copia est. 10
nec tus cremandum postulo
nec liba crusti mellei,
foculumque vivi caespitis
vanis relinquo altaribus.
Deus precandus est mihi 15
ac filius summi Dei,
maiestas unius modi,
sociata sacro spiritu.
et ecce iam vota ordior:
et cogitatio numinis 20
praesentiam sentit pavens.
pavetne quidquam spes, fides?