Prima salutatio  |
Personae:
BEATRIX PUELLA, EMMANUEL, EUSEBIUS.
Beat.
JESUS CHRISTUS exuscitet vos a somno vitiorum. Heus pueri estis ne hodie evigilaturi?
Eus.
Nescio quid incidit mihi in oculos, ita videor eos habere plenos arenae.
Beat.
Haec est tua prima cantio matutina, et bene vetus: aperiam fenestras hasce ambas, ligneam et vitream, ut feriat clarum mane vestros amborum oculos. Surgite, surgite.
Eus.
Tam multo mane?
Beat.
Propior est meridies quam aurora. Vis tu Emmanuel recentem subuculam?Subucula est virilis camisia.
Emm.
Nihil nunc est necesse, haec est satis munda, cras sumam alteram. Cedo mihi thoracem.
Beat.
Quem? simplum, an diploidem?Diplois, de quavis re duplicata dicitur.
Emm.
Quem voles, mea nihil refert. Porrige huc simplum, ut si sim, hodie lusurus pila, minus graver.
Beat.
Hic est semper tuus mos: prius de lusu cogitas, quam de schola.
Emm.
Quid tu dicis inepta? et schola ipsa vocatur ludus.
Beat.
Ego non intelligo vestras grammaticationes et sophismata.
Emm.
Da ligulas astrictoriasLigulae astrictoriae, quibus vestimenta stringuntur. coriaceas.
Beat.
Fractae sunt: accipe sericas, et sic jussit tuus paedagogus. Quid jam? vin femoralia, et tibialia, quoniam est aestus?
Emm.
Minime vero, dato feminicruralia:Feminicruralia novum pro caligis. quaeso constringe me.
Beat.
Quid, tu habes brachia foenea, aut butyracea?
Emm.
Non, sed filo tenui consuta. Hui qualia dedisti mihi astrigmenta exarmata,Exarmata, sine ferris. et lacera.
Beat.
Memineris te heri alea perdidisse integra.
Emm.
Qui scis?
Beat.
Ego per rimulam ostii observabam te cum Guzmanulo ludentem.
Emm.
Amabo ne id paedagogus resciat.
Beat.
Immo ego narrabo, quum primum appellaris me deformem, ut soles.
Emm.
Quid si rapacem?
Beat.
Quidvis, modo ne deformem.
Emm.
Cedo calceos.
Beat.
Utros? longo obstragulo,Obstragulum est corium calcei superius. an brevi?
Emm.
Tectos propter lutum.
Beat.
Propter lutum aridum, quod alio nomine vocatur pulvis. Sed bene facis, nam in apertis cingulum est fractum, et fibula amissa.
Emm.
Indue rogo.
Beat.
Tu ipse facito.
Emm.
Non possum me flectere.
Beat.
Tu quidem facile te curvares, desidia vero tua difficile: an deglutisti ensem, ut circulator ille nudius quartus? adeone es jam delicatus? quid facies grandior?
Emm.
Astringe nodo laxo gemino: quod est elegantius.
Beat.
Nihil minus: solveretur nodus illico, et decideret tibi calceus e pedibus: praestat vel gemino astricto, vel astricto et laxo. Sume tunicam manicatam, et cingulum textile.
Emm.
Minime id quidem, sed coriaceum venatorium.
Beat.
Mater vetat: vis tu omnia arbitratu tuo facere? et tu heri fregisti aciculam fibulae.Aciculam fibulae,id quo corrigia astringitur.
Emm.
Non poteram alioqui exfibulare. Da ergo illud puniceum ex lino.
Beat.
Cape: cinge te cinctu Gallico.Cinctus Gallicus quomodo solent Galli se cingere.[1] Pecte caput prius radiis rarioribus, tum densioribus: apta pileum vertici, ne in occipitium rejicias more tuo, aut in fronten et oculos.
Emm.
Prodeamus jam tandem.
Beat.
Quid? illotis manibus et facie?
Emm.
Ista tua tam molesta curiositate taurum jam enecasses, nedum hominem, videris mihi non puerum vestire, sed sponsam.
Beat.
Eusebi, adfer pollubrumPollubrum est vas, ex quo aqua funditur. cum urceolo, Urceol. patina, in qua funditur. funde altius: stilla potius ex epistomio,Epistomium est nasi gutta. quam profundas: elue sordes istas ex nodis digitorum : ablue os, et gargariza, frica bene cilia, et palpebras, tum glandulas sub Auriculis duriter; cape linteum, exterge te. Deum immortalem, de omnibus es sigillatim admonendus, nihilne ipse tua sponte faceres?
Emm.
Vah, nimium es importuna, et odiosa.
Beat.
Et tu nimium scitus puer, ac formosulus. Deosculare me : flecte jam genua, et ante hanc Servatoris nostri imaginem recita precationem dominicam, et preces alias, ut habes de more, antequam pedem ponas extra cubiculum. Vide mi Emmanuel, uti de re nulla alia cogites, dum oras. Mane paulisper, appende sudariolum hoc de zona, ad nares emungendas et purgandas.
Emm.
Sumne satis ad arbitrium tuum compositus?
Beat.
Es.
Emm.
Ad meum minime, quoniam jam tandem ad tuum; ausim facere sponsionem,Facere sponsionem deponere certare precio. me horam unam vestiendo consumpsisse.
Beat.
Quid si vel duas? Quo eras alioqui iturus? Quid acturus? fossurus credo, aut araturus.
Emm.
Quasi desit quod agam.
Beat.
O magnum virum, vehementer in nihil agendo occupatum.
Emm.
Non hinc abis cavillatrix? abi, aut ego te abigam hoc calceo, aut calanticamCalantica, indumentum est capitis muliebre. tibi detraham de capite.
Notae
- ↑ Cinctu Gallico, quamquam in margine appositum est, quomodo se solent Galli cingere: tamen scio aliquos ignorare qualis sit hic cingendi modus. Aliter enim cinguntur Galli, ac Germani, et Flandri: Germani nanque partem illam cinguli qua ensis innectitur, ad genua usque dimittunt: femora ita non illa cingunt, quo facilius enses illos oblongos, quos gerunt, distringere possint. Flandri aliquanto superius quam Germani cinguntur. Galli vero fere ad umbilicum cingula gestant, ut ante hac Hispani, qui jam Germanicum cingendi modum imitari coeperunt.