Vastantem segetes et pinguia culta ruentem Liquerat abscisa rusticus aure suem, Ut memor accepti referens monumenta doloris Ulterius teneris parceret ille satis. Rursus in excerpti deprehensus crimine campi, Perdidit indultae perfidus auris onus. Nec mora, praedictae segeti caput intulit horrens. Poena sed indignum quod geminata facit, Tunc domini captum mensis dedit ille superbis, In varias epulas plurima frusta secans. Sed cum consumpti dominus cor quaereret apri, Impatiens fertur quod rapuisse cocus, Rusticus hoc iustam verbo compescuit iram, Affirmans stultum non habuisse suem. Nam cur membrorum demens in damna redisset, Atque uno totiens posset ab hoste capi? Haec illos descripta monent, qui saepius ausi Numquam a peccatis abstinuere manus.
XXIX