CL. MALTRETI PRAEFATIO.
LECTORI.
Si consilium est, erudite Lector, hos Libros non prius
legere, quam Auctorem pernoveris qualis fuerit; hinc oculos et
manum converte ad consequentem Tomum. Ibi Nicolaus
Alemannus, vir doctrina praestans, suis in Historiam Arcanam
Praefationibus te voti compotem faciet: simul etiam docebit,
quot et quam graves temporis hominumque iniurias Procopii
Caesariensis pertulerint. Quod autem vir idem clar.
faciendum reliquit aliis de veteri illorum interpretatione iudicium;
id sibi sumpserat Iosephus Scaliger, suorum sydus, cum haec
ad Davidum Hoeschelium scriberet: Recte iudicas dignum esse
Procopium, qui edatur, et quia dignus, et quia male ab
Interprete acceptus est. Qui et τὰ καιριώτατα omiserit, et quae
retinuit, pessima fide converterit. Nam et finem Belli
Gotthici iusto pene volumine fraudavit. Hoc ultimum censurae
caput proprie convenit in Christophorum Personam Romanum:
qui Tetradem secundam librorum de Bellis ita truncavit, ut
triadem fecerit. Caeterae reprehensionis partes ei communes
sunt cum Raphaele Volaterrano, Tetradis prioris Interprete.
Quando Scaliger ea, quae modo retuli, ad amicum scribebat,
Graeca Procopii monimenta nondum praelo in publicum emissa
fuerant; praeterquam libri περὶ κτισμάτων: qui quam essent
mulli, in loco dicam. Hos multo auctiores Hoëkschelius cum
