Liber de quinque essentiis.
Sapiens Aristoteles ubi dialecticam incepit dixit quod
scientia cuiusque rei, quae inquiritur, cadit [vel continetur] sub
philosophia, quae est omnis rei scientia. Oportet ergo in primis
ut philosophiam apud illam scientiam dividamus, et consideremus
sub qua ipsius partium contineatur res.
Philosophia igitur dividitur in scientiam et operationem [id est theoricam et practicam]. Et illud iterum ideo quoniam anima dividitur in duas partes, quae sunt cogitatio vel ratio et sensus, quemadmodum ostendimus in libro categoriarum. Quia igitur philosophia non est nisi ordo animae, conveniens est ei ut dividatur in duas partes, sicut anima in duas partes dividitur. Sicut enim anima dividitur in cogitationem [vel rationem] et sensum, et similiter dividitur philosophia in scientiam et operationem, ut scientia videatur pars cogitativa et operatio pars sensibilis.
