ventus illōrum tēlis confossus est. Quàm cārus populo fuerit, mærōre funeris indicātum est: sui eum cīves diù luxērunt.
In locum Jūdæ suffectus est Jonathas. Is, fraternæ virtūtis æmulus, Bacchǐdem pluribus præliis vīcit, illumque ad petendam pācem adēgit.
Intereà Demetrium rēgem interfēcit Alexander, qui se Antiochi filium dictitābat. Is fœdus cum Jonathâ fecit, eum veste purpureâ donāvit, semperque in datâ fide mansit. Ità quandiù Alexander regno potītus est, res Judæōrum tranquillæ fuērunt: sed paūlò post, Jonathas à Triphōne quǒdam per insidias necātus est.
Summa rērum ad Simōnem Jonathæ frātrem delāta est. Is fūnus frātris magnificè curāvit: nec diù regnāvit; nam et ipse generi sui fraūde periit.
Simōni patri successit Joannes nomine Hircānus, qui post annum mortuus hærēdem reliquit filium Aristobulum. Hic, prīmus omnium post captivitātem, regium nōmen sumpsit, capitique diadēma imposuit.
