Haec pagina emendata est
Vim temperatam di quoque provehunt
In majus ; idem odere vires
Omne nefas animo moventes.
Testis mearum centimanus Gyas
Sententiarum, notus et integræ
Tentator Orion Dianæ,
Virginea domitus sagitta.
Injecta monstris Terra dolet suis
Mæretque partus fulmine luridum
Missos ad Orcum ; nec peredit
Impositam celer ignis Ætnam ;
Incontinentis nec Tityi jecur
Reliquit ales, nequitiæ additus
Custos ; amatorem trecentæ
Pirithoum cohibent catenæ
Cœlo tonantem credidimus Jovem
