Haec pagina emendata est
Fertur pudicæ conjugis osculum
Parvosque natos, ut capitis minor,
A se removisse, et virilem
Torvus humi posuisse voltum,
Donec labantes consilio Patres
Firmaret auctor nunquam alias dato,
Interque mærentes amicos
Egregius properaret exul.
Atqui sciebat quæ sibi barbarus
Tortor pararet : non aliter tamen
Dimovit obstantes propinquos,
Et populum reditus morantem,
Quam si clientum longa negotia
Dijudicata lite relinqueret
Tendens Venafranos in agros,
Aut Lacedæmonium Tarentum.
