Haec pagina emendata est
« Derepta vidi ; vidi ego civium
Retorta tergo bracchia libero,
Portasque non clausas, et arva
Marte coli populata nostro.
Auro repensus scilicet acrior
Miles redibit ? flagitio additis
Damnum. Neque amissos colores
Lana refert medicata fuco ;
Nec vera virtus, cum semel excidit,
Curat reponi deterioribus.
Si pugnat extricata densis
Cerva plagis, erit ille fortis,
Qui perfidis se credidit hostibus ;
Et Marte Pœnos proteret altero,
Qui lora restrictis lacertis
Sensit iners, timuitque mortem.
Hic, unde vitam sumeret inscius,
Pacem duello miscuit. O pudor !
O magna Carthago, probrosis
Altior Italiæ ruinis ! »
