Haec pagina emendata est
Sic mihi, qui multum cessat, fit Chœrilus ille,
Quem bis terque bonum cum risu miror ; et idem
Indignor, quandoque bonus dormitat Homerus.
Verum operi longo fas est obrepere somnum.
Ut pictura poesis ; erit quæ, si propius stes,
Te capiat magis ; et quædam, si longius abstes.
Hæc amat obscurum ; volet hæc sub luce videri,
Judicis argutum quæ non formidat acumen.
Hæc placuit semel ; hæc decies repetita placebit.
O major juvenum, quamvis et voce paterna
Fingeris ad rectum, et per te sapis, hoc tibi dictum
Tolle memor ; certis medium et tolerabile rebus
Recte concedi. Consultus juris et actor
Causarum mediocris abest uirtute diserti
Messallæ nec scit quantum Cascellius Aulus ;
Sed tamen in pretio est. Mediocribus esse poetis
