Haec pagina emendata est
Ut penitus notum, si tentent crimina, serves,
Tuterisque tuo fidentem præsidio ; qui
Dente Theonino cum circumroditur, ecquid
Ad te post paulo ventura pericula sentis ?
Nam tua res agitur, paries cum proximus ardet,
Et neglecta solent incendia sumere vires.
Dulcis inexpertis cultura potentis amici ;
Expertus metuit. Tu, dum tua navis in alto est,
Hoc age, ne mutata retrorsum te ferat aura.
Oderunt hilarem tristes, tristemque jocosi ;
Sedatum celeres, agilem gnavumque remissi ;
Potores porrecta negantem pocula, quamvis
Nocturnos jures te formidare vapores ;
Deme supercilio nubem ; plerumque modestus
Occupat obscuri speciem, taciturnus acerbi.
