Votiva pateat veluti descripta tabella
Vita senis. Sequor hunc, Lucanus an Apulus, anceps ;
Nam Venusinus arat finem sub utrumque colonus,
Missus ad hoc, pulsis, vetus est ut fama, Sabellis,
Quo ne per vacuum Romano incurreret hostis,
Sive quod Apula gens, seu quod Lucania bellum
Incuteret violenta. Sed hic stylus haud petet ultro
Quemquam animantem, et me veluti custodiet ensis
Vagina tectus ; quem cur destringere coner
Tutus ab infestis latronibus ? O pater et rex
Jupiter, ut pereat positum robigine telum,
Nec quisquam noceat cupido mihi pacis ! At ille,
Qui me commorit (Melius non tangere ! clamo),
Flebit, et insignis tota cantabitur Urbe.
Cervius iratus leges minitatur et urnam :
Canidia Albuti, quibus est inimica, venenum,
Grande malum Turius, si quis, se judice, certet.
