 Map: Africa |
119. Curio gains an Initial Advantage  |
Interim Mārcius nāvēs longās Uticam dēdūxerat; cuius adventū cōgnitō, Cūriō prōnūntiārī iussit onerāriīs, quae in portū ad ancoram stābant numerō circiter CC, sē in hostium locō habitūrum omnēs, quī nōn statim ad Castra Cornēlia nāvis trādūxissent. Quā prōnūntiātiōne factā, sine morā sublātīs ancorīs omnēs reliquērunt Uticam et, quō imperātum erat, trānsiērunt. Quae rēs omnium rērum cōpiā exercitum nostrum complēvit. Hīs rēbus gestīs, Cūriō sē in castra ad Bagradam recipit, posterōque diē exercitum Uticam dūcit et prope oppidum castra ponit. Nōndum opere castrōrum perfectō, equitēs ex statiōne nūntiant magna auxilia equitum peditumque ā rēge Iubā missa Uticam venīre; eōdemque tempore vīs magna pulveris cernēbātur, et temporis pūnctō prīmum agmen erat in cōnspectū. Quā rē nova Cūriō permōtus equitēs suōs praemittit, quī prīmum impetum sustineant; ipse, celeriter ab opere dēductis legiōnibus, aciem īnstruit.