Carmina (Horatius)/Liber I/Carmen XIV

E Wikisource
Jump to navigation Jump to search
Liber I
Carmen XIV
23 a.Ch.n.
Fairytale left blue.png I, XIII I, XV Fairytale right blue.png


O navis, referent in mare te novi
fluctus. o quid agis? fortiter occupa
portum. nonne vides, ut
nudum remigio latus

et malus celeri saucius Africo
antemnaeque gemant ac sine funibus
vix durare carinae
possint imperiosius

aequor? non tibi sunt integra lintea,
non di, quos iterum pressa voces malo.
quamvis Pontica pinus,
silvae filia nobilis,

iactes et genus et nomen inutile:
nil pictis timidus navita puppibus
fidit. tu, nisi ventis
debes ludibrium, cave.

nuper sollicitum quae mihi taedium,
nunc desiderium curaque non levis,
interfusa nitentis
vites aequora Cycladas.

Fairytale left blue.png I, XIII I, XV Fairytale right blue.png