1Saulus autem adhuc aspirans minarum et caedis in discipulos domini accessit ad principem sacerdotum 2et petiit ab eo epistulas ad Damascum ad synagogas, ut si quos invenisset huius viae, viros ac mulieres, vinctos perduceret in Hierusalem. 3Et cum iter faceret, contigit ut adpropinquaret Damasco, et subito circumfulsit eum lux de caelo, 4et cadens in terram audivit vocem dicentem sibi Saule Saule, quid me persequeris? 5Qui dixit Quis es, domine? Et ille Ego sum Iesus quem tu persequeris. 6Sed surge et ingredere civitatem, et dicetur tibi quid te oportet facere. 7Viri autem illi qui comitabantur cum eo stabant stupefacti, audientes quidem vocem, neminem autem videntes. 8Surrexit autem Saulus de terra, apertisque oculis nihil videbat: ad manus autem illum trahentes introduxerunt Damascum. 9Et erat tribus diebus non videns, et non manducavit neque bibit. 10Erat autem quidam discipulus Damasci nomine Annanias, et dixit ad illum in visu dominus Annania. At ille ait Ecce ego, domine. 11Et dominus ad illum Surgens vade in vicum qui vocatur rectus, et quaere in domo Iudae Saulum nomine Tharsensem: ecce enim orat, 12et vidit virum Annaniam nomine introeuntem et inponentem sibi manus ut visum recipiat. 13Respondit autem Annanias Domine, audivi a multis de viro hoc, quanta mala sanctis tuis fecerit in Hierusalem, 14et hic habet potestatem a principibus sacerdotum alligandi omnes qui invocant nomen tuum. 15Dixit autem ad eum dominus Vade, quoniam vas electionis est mihi iste, ut portet nomen meum coram gentibus et regibus et filiis Israhel: 16ego enim ostendam illi quanta oporteat eum pro nomine meo pati. 17Et abiit Annanias et introivit in domum, et inponens ei manus dixit Saule frater, dominus Iesus misit me, qui apparuit tibi in via qua veniebas, ut videas et implearis spiritu sancto. 18Et confestim ceciderunt ab oculis eius tamquam squamae, et visum recepit, et surgens baptizatus est, 19et cum accepisset cibum, confortatus est. Fuit autem cum discipulis qui erant Damasci per dies aliquos. 20Et continuo in synagogis praedicabat Iesum quoniam hic est filius dei. 21Stupebant autem omnes qui audiebant, et dicebant Nonne hic est qui expugnabat in Hierusalem eos qui invocant nomen istud? et huc ad hoc venit ut vinctos illos duceret ad principes sacerdotum? 22Saulus autem multo magis convalescebat et confundebat Iudaeos qui habitabant Damasci, adfirmans quoniam hic est Christus. 23Cum implerentur autem dies multi, consilium fecerunt Iudaei ut eum interficerent: 24notae autem factae sunt Saulo
