Successit in locum Mōsis Josue, quem ipse prius designaverat.
Ut Hebræi in terram promissam introducerentur, Jordānis erat trajiciendus; nec erat iis navium copia, nec vadum præbēbat amnis tunc plēno alveo fluens.
Deus vēnit eis auxilio: Josue jussit præferri arcam fœderis, et populum sequi.
Appropinquante arcâ, aquæ, quæ supernè defluēbant, stetērunt instar muri: quæ aūtem infrà, descendērunt et alveum siccum reliquērunt.
Hebræi incedēbant per arentem alveum, dōnec rīpam oppositam attingerent.
Tum reversæ sunt aquæ in locum pristinum.
Josue verò duodecim lapides è medio amne sublātos erexit, ut essent perenne rei monumentum.
Dixit Hebræis: Si quandò vos interrogaverint filii vestri quorsùm spectat ista lapidum congeries? respondebitis; Sicco pede trajecimus Jordānem istum; idcirco positi sunt lapides ad sempiternam facti memoriam, ut discant quanta sit Dei potentia
