Haec pagina emendata et bis lecta est
230 COLLOQUIUM 8EMLR.
nitatem. Et amabam ut qui perditissime.
- gl. Miseret me tui. Sed quid interim consilii tentatum est?
- pa. Id quod solet in rebus desperatis. Pater abdicabat, perierat res, perierat uxor, undique audiebam gurges, nepos, helluo. Quid plura? Serio mecum deliberabam, an suspenderem me, an aliquo coniicerem memet in monasterium.
- eu. Crudele consilium. Scio utrum elegeris, mitius mortis genus.
- pa. Imo quod mihi tunc visum est crudelius; adeo mihi displicebam totus.
- gl. Atqui complures eo se deiiciunt, ut suavius vivant.
- pa. Corraso viaticulo, furtim me subduxi procul a patria.
- gl. Quo tandem?
- pa. In Hiberniam; illic factus sum Canonicus ex horum genere, qui extime linei sunt,[1] intime lanei.
- gl. Apud Hibernos igitur hibernasti?
- pa. Non, sed duos menses apud hos versatus navigavi in Scotiam.
- gl. Quid te offendit apud illos?
- pa. Nihil, nisi quod institutum illud mihi videbatur mitius quam pro meritis eius, qui non uno suspendio dignus erat.
- eu. Quid in Scotia designatus est?
- pa. Illic ex lineo factus sum pelliceus apud Carthusios.[2]
- eu. Homines plane mundo mortuos.
- pa. Ita mihi visum est, quum audirem illos canentes.
- gl. Quid? canunt etiam mortui? Quot menses apud illos egisti Scotos?
- pa. Propemodum sex.
- gl. O constantiam!
- eu. Quid illic offendit?
- pa. Quia mihi visa est vita segnis ac delicata. Deinde multos illic reperi non admodum sani cerebri, ob solitudinem, ut arbitror. Mihi parum erat cerebri; verebar ne totum periret.
- po. Quo deinde devolasti?
- pa. In Galliam. Illic reperi quosdam totos pullatos, ex instituto divi Benedicti, qui colore vestis testan-
