Haec pagina emendata est
enim et senescunt et emoriuntur arbores, at non sentiunt, quanquam his quoque nonnulli sensum tribuunt stupidum. In adhesis vix deprehenditur sensus, in spongia deprehenditur ab avulsoribus, in maoribus materiarum caesores sensum comperiunt, si quid illis credimus. Aiunt enim: Si palma ferias truncum arbores, quam velis caedere, quemadmodum fere solent materiarii, difficilius arbor inciditur, ut semet contraxit metu. Quod autem vivit ac sentit, animal est. Nihil autem prohibet esse uegetabile quod non sentit, veluti fungi, betae, caules.
- fa. Ista si vivunt utcunque, si sentiunt utcunque, si moventur quum adolescunt, quid probibet eadem dignari animalis cognomine?
- eu. Non ita visum est maioribus, neque nobis fas est ab illorum placitis discedere, ac ne refert quidem ad hoc, quod nunc agimus.
- fa. Atqui non feram eandem esse animam scarabei et hominis.
- eu. Non est eadem, o bona, sed ratio quadantenus communis est. Animat, uegetat, sensibile reddit corpus tuum anima tua. Idem agit scarabei anima in suo corpore. Nam quod quaedam aliter aut aliud agit anima hominis quam scarabei, partim in causa est materia. Non canit, non loquitur scarabeus, quia caret organis ad haec idoneis.
- fa. Illud igitur dicis, si anima scarabei demigraret in corpus hominis, idem ageret quod agit anima humana.
- eu. Imo, ne si mens quidem angelica, quemadmodum dixi. Nihil autem interest inter angelum et animam humanam, nisi quod hominis anima in hoc condita est, ut agat corpus humanum naturalibus organis instructum; quemadmodum anima scarabei non movet nisi corpus scarabei, angelus non in hoc conditus est, ut animat corpus, sed ut absque corporalibus organis intelligat.
- fa. Num idem potest anima?
- eu. Potest quidem a corpore semota.
- fa. Non est igitur sui iuris, dum est in corpore?
