Haec pagina emendata est
Rogare longo putidam te sæculo,
Vires quid enervet meas ?
Cum sit tibi dens ater, et rugis vetus
Frontem senectus exaret,
Hietque turpis inter aridas nates
Podex, velut crudæ bovis.
Sed incitat me pectus, et mammæ putres,
Equina quales ubera,
Venterque mollis, et femur tumentibus
Exile suris additum.
Esto beata ; funus atque imagines
Ducant triumphales tuum,
Nec sit marita, quæ rotundioribus
Onusta baccis ambulet.
Quid, quod libelli Stoïci inter sericos
Jacere pulvillos amant ?
Illiterati num minus nervi rigent,
Magisve languet fascinum ?
Quod ut superbo povoces ab inguine,
Ore allaborandum est tibi.
