230nec sati’ digna quoi committas primo partu mulierem.
tamen eam adducam? inportunitatem spectate aniculae
quia compotrix eius est. di, date facultatem obsecro
huic pariundi atque illi in aliis potiu’ peccandi locum.
sed quidnam Pamphilum exanimatum video? vereor quid siet.
235opperiar, ut sciam num quid nam haec turba tristitiae adferat.
v Pamphilvs Mysis
PA. Hoccinĕst humanum factu aut inceptu? hoccin[est] officium patris?
MY. quid ĭllud est? PA. pro de͡um fidem quid ĕst, si haec non contumeliast?
uxorem decrerat dare sese mi hodie: nonne oportuit
praescisse me ante? nonne priu’ communicatum oportuit?
240 MY. miseram me, quod verbum audio!
PA. quid? Chremes, qui denegarat se commissurum mihi
gnatam su͡am uxorem, id mutavit quia me inmutatum videt?
itane obstinate operam dat ut me a Glycerio miserum abstrahat?
quod si fit pereo funditus.
245adeon hominem esse invenustum aut infelicem quemquam ut ego sum!
pro deum atque hominum fidem!
