Usor:Sakvaka/Syntagma musicum/Pars I/Membrum I/Caput XI

Caput X	Caput XII

Caput xi.

De usu Psalmodiæ illustri in aulis Imperatorum, per transitionem ab Ecclesiastico et scholastico ad domesticum, privatumque usum.

Nec minus efficacem ea, quæ usu scholastico et Ecclesiastico hactenus fuit expressa, vim Musicæ Choralis et Psalmodiæ continet, et exerit usus cum Aulicus, tum Domesticus et privatus, quo Hymnologia exercitata fuit, non tantum in vita, sed etiam in ipsa morte et martyriis.

Aulicæ Musicæ virtua insignis apparet exemplis Theodosii et Constantini.

Cum Theodosius Imperator ob statuas, per seditionem deiectas, populo Antiocheno graviter irasceretur, et exquisitissima suppliciorum exempla, magnamque stragem civium minaretur, Flavianus, Antiochenæ Ecclesiæ Episcopus, non modo in publicis privatisque Christianæ plebis congressibus Deum hymnis et Psalmis invocari voluit, ut iram Imperatoris mitigaret, sed easdem etiam lugubres, et ad æternum Deum supplices cantilenas adolescentibus tradidit, qui admensam Imperatoriam canere solebant, ut illas coram Imperatore concinerent. Quibus valde lactuosis Imperator ita fuit commotus, ut cum phialam manibus teneret, lacrymis abstinere non potuerit: Eaque ratione urbi, cui gravissime ob negatum tributum, et per seditionem deiectam uxoris Placillæ statuam succensebat, reconciliatus est, omnemque iram ilico ex animo deposuit. (Refert. Sozomenus lib. 7. cap. 23.)

Quemadmodum autem Theodosius Imperator ad mensam Psalmos Davidis audire non dubitavit: ita de Constantino Imperatore commemorat Eusebius libro primo vitæ ipsius, quod in aula sua ministros aluerit, qui supplicationibus pro Imperatore, Imperiique salute et incolumitate perpetuo vacarent, sacrosque Psalmos in honorem divinæ Maiestatis concinerent: In Ecclesiæ etiam congressibus Psalmos cantare primus ipse incœpit.

Et ipse Salomon, Davidis filius, inter ardua Regni negocia in hortis Engaddæ Canticum Canticorum in morem Dramatis cecinit, quo nihil suavius Hebræorum lingua sonat, nihil sanctius interpretationis allegoria explicat.