Jump to content

Pagina:Gauss, Carl Friedrich - Werke (1870).djvu/36

E Wikisource
Haec pagina emendata est
26
de congruentiis primi gradus
z≡   17(mod9) unde colligitur z≡3041(mod5040)
−4(mod5)
−4(mod7)
33(mod16)

Ceterum palam est, plerumque commodius fore, si de conditionibus remanentibus eae quae ex una eademque conditione evolutae erant seorsim recolligantur, quum hoc nullo negotio fieri possit; e. g. quando ex conditionibus z≡a(modA′), z≡a(modA″) etc. aliquae abierunt: quae ex reliquis restituitur, haec erit, z≡a secundum modulum, qui est productum omnium modulorum ex A′,A″,A‴ etc. remanentium. Ita in nostro exemplo ex conditionibus z≡−4(mod5), z≡−4(mod7) ea ex qua ortae erant z≡−4(mod35) sponte restituitur. Porro hinc sequitur, haud prorsus perinde esse, quaenam ex conditionibus superfluis reiiciantur, quantum ad calculi brevitatem: sed haec aliaque artificia practica, quae ex usu multo facilius quam ex praeceptis ediscuntur, hic tradere non est instituti nostri.


36.

Quando omnes moduli A,B,C,D etc. inter se sunt primi, sequenti methodo saepius praestat uti. Determinetur numerus α secundum A unitati, secundum reliquorum modulorum productum vero cifrae congruus, sive sit α valor quicunque (plerumque praestat minimum accipere) expressionis 1BCD etc.(modA) per BCD etc. multiplicatus (vid. art. 32); similiter sit β≡1(modB) et ≡0(modACD etc.), γ≡1(modC) et ≡0(modABD etc.), etc. Tunc si numerus z desideratur, qui secundum modulos A,B,C,D etc. numeris a,b,c,d etc. respective sit congruus, poni poteritz≡αa+βb+γc+δd etc.(modABCD etc.)Manifesto enim, αa≡a(modA); reliqua autem membra βb,γc etc. omnia ≡0(modA): quare z≡a(modA). Similiter de reliquis modulis demonstratio adornatur. Haec solutio priori praeferenda, quando plura huiusmodi problemata sunt solvenda, pro quibus moduli A,B,C etc. valores suos retinent; tunc enim numeri α,β,γ etc., valores constantes nanciscuntur. Hoc usu venit in problemate chronologico ubi quaeritur, quotus in periodo Juliana sit annus, cuius indictio, numerus aureus, et cyclus solaris dantur. Hic A=15, B=19, C=28; quare,