Pro defensione trium capitulorum

by Facondus Hermianensis

Facondus Hermianensis

Epistola fidei catholicae

Saeculo VI

editio: Migne
fons: Corpus Corporum

LIBER I 

Migne Patrologia Latina Tomus 67

FacHer.PrDeTrC 67 Facundus Hermianensisfl.546-571 Parisiis J. P. Migne 1848 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin

Pro defensione trium capitulorum

- PRAEFATIO.

• - LIBER PRIMUS.

• - LIBER SECUNDUS.

• - LIBER TERTIUS.

• - LIBER QUARTUS.

• - LIBER QUINTUS.

• - LIBER SEXTUS.

• - LIBER SEPTIMUS.

• - LIBER OCTAVUS.

• - LIBER NONUS.

• - LIBER DECIMUS.

• - LIBER UNDECIMUS.

• - LIBER DUODECIMUS.

PRAEFATIO.

Cum in praejudicium sancti concilii Chalcedonensis impugnatores ejus Acephali per quosdam subriperent, ut epistola Ibae Edesseni episcopi, quam ad se delatam memorata synodus catholicam judicavit; sed et Theodorus Mopsuestenus, ejusque doctrina, quae in eadem epistola Ibae laudata est; nec non et quaedam Theodoreti Cyrri episcopi scripta, qui in praedicto Chalcedonensi concilio epistolam dogmaticam papae Leonis asseruit, sub anathemate damnarentur: hoc opus suadentibus fratribus ad imperatorem Constantinopoli scripsi. Quo necdum finito ac pertractato, adductus est Romanus episcopus: in cujus examine cum gestis super hac causa disceptaremus, mediante conflictu interrumpi acta praecepit; et ab universis episcopis qui aderamus expetiit, ut scripto quisque responderet quod ei de his capitulis videretur. Cum ergo per magistrum officiorum sub gravi necessitate respondere constringerer, vix mihi septem dierum induciae datae sunt, in quibus erant etiam duo festi. Unde, ut omnia dicerem, quae magis necessaria judicabam, ex his libris aliquanta decerpsi: quia non occurrebam omnia nova dicere, siquidem tria millia versuum excedit illa responsio. Sane quoniam, sicut dixi, necdum a me pertractati fuerant iidem libri, quaedam testimonia pro mendositate codicum ex quibus ea posueramus, vel pro incuria translatorum, aliter continebant, quae sic etiam in illam responsionem transcripta sunt. Idcirco igitur praeloqui ac praemonere curavi, ut neminem qui memorata responsione perlecta hos contigerit libros offendat ista diversitas; sed illic ignoscat festinanti, et huic potius credat. Nam et aliqua ibi cum perturbatione prolata moderatius hic ordinatiusque tractata sunt.